Shishet plastike të ujit shumë shpejt mund të shndërrohen në materiale që i takojnë të kaluarës. Ndotja nga plastika është duke u bërë një problem gjithnjë e më i madh. Konsumi global i plastikës është rritur nga rreth 5 milionë tonë në vit në dekadën e viteve 1950-të, në gati 110 milionë tonë në vitin 2009. Plastika është material i vështirë që i duhet deri në 1 mijë vjet për t’u tretur. Madje edhe pasi degradon, përfundon në pjesëza mikroskopike helmuese në trupin dhe stomakun e kafshëve që ne konsumojmë. Një kompani angleze ka krijuar një produkt që mund të ndihmojë për zgjidhjen e këtij problemi.
Befasi madje edhe shokim, mund të pikaset në reagimet e para të njerëzve që shijojnë një “Ooho” (Uho!).
Por, pasi kalon surpriza fillestare, ata kuptojnë se e vetmja gjë që ndryshon në atë çfarë po hanë, është paketimi.
“Është një membranë e përbërë nga alga deti që mund të përmbajë ujë ose çfarëdolloj lëngu tjetër. Prodhohet nga ekstraktet e një alge ngjyrë kafe që quhet alginate”, shpjegon Rodrigo Garcia Gonzalez, i firmës “Skipping Rocks Lab”.
Membrana nuk ka shije dhe është e ngrënshme. Por, edhe nëse thith vetëm ujin që përmban dhe vetë membranën e hedh poshtë, ajo dekompozohet për rreth katër javë.
“Ja fillojmë me algat si material bazë, por më tej kryhen disa procese që mundësojnë një sferë me fortësinë e duhur. Siç e shikoni,… është goxha e fortë”, thotë zoti Gonzalez duke e hedhur sferën në ajër.
Një shishe plastike uji kërkon qindra vjet për të degraduar.
“Shumica e njerëzve marrin një shishe që e mbajnë për rreth 5 minuta. E pinë ujin dhe pastaj e hedhin. Përse duhet të vazhdojë ajo të ekzistojë për 700 vjet të tjera? Pra, kjo është absolutisht një zgjidhje për këtë problem”, thotë Lise Honsinger.
Por, “Ooho” nuk mund të shërbejë si një zgjidhje e plotë. Ajo nuk mund të rimbushet. Ka përmasa të vogla dhe jetëgjatësinë e ruajtjes në magazinim e ka vetëm për pak ditë.
Ekipi thotë se po punon edhe në këtë drejtim.
“Po punojmë p.sh. për të zgjatur jetëgjasinë e magazinimit, për opsione të ndryshme për sa i përket trashësisë; nëse do të duam p.sh. diçka tjetër që qëndron më drejt, apo që të jetë më fleksibël për maratonat e vrapit ku njerëzit duan thjesht ta kapërdijnë siç është”, thotë zonja Honsinger.
Një tjetër problem është shkallëzueshmëria. Ekipi është në gjendje të prodhojë vetëm disa mijëra në ditë, por po punon për një sistem të automatizuar që do ta rrisë këtë shifër në qindra mijëra, raporton VOA.
Ata gjithashtu kanë zbuluar mënyrën se si “Ooho” të përmbajë alkool. Pra, kur të porosisni pijen e radhës, përgatituni që ajo t’ju vijë në një gotë rrumbullake të ngrënshme.
Discussion about this post