Bota ndryshoi përgjithmonë në 6 muajt e ankthshëm të pandemisë së Covid-19.
Çdo eksperiencë që lidhej me ndërveprimin social iu desh t’i përshtatej realitetit të ri me distancim social.
Në një situtatë ku afrimiteti nuk është i këshilluar, na u kërkua të jemi kreativ për të qenë në shoqëri e për të gjetur mënyra alternative ndaj zakoneve të vjetra. Dhe idetë inovative nuk munguan.
Eksperienca e të ngrënit jashtë ishte mes të parave që kërkoi ndryshime. Në Francë, një abazhur i tejdukshëm rreth kokës mund të lejonte vizitorët të darkojnë të sigurtë në restorante.
Objekti i krijuar nga dizenjatori Christophe Gernignom ndihmoi pronarët e disa restoranteve të mbronin klientët nga Covid-19.
Në Holandë, pjesëtarë nga e njëjta familje mund të shijonin ndonjë drekë ose darkë romantike nën dritën e qiririt, buzë një prej kanaleve të Amsterdamit, vetëm se do të duhej të qëndronin brenda një kabine të vogël prej xhami, të konceptuar posaçërisht.
Shpikësit izraelitë krijuan një maskë që lejon qytetarët të konsumojnë ushqim pa e hequr maskën mbrojtëse nga fytyra.
Pajisja mund të reduktojë rrezikun e infektimit gjatë qëndrimit në restorant.
Një kapëse e komanduar me dorë, e cila funksionon pak a shumë në të njëjtën mënyrë si çiklisti komandon frenat, mundëson hapjen dhe mbylljen e një të çare në maskë që ushqimi të kalojë sipas stilit të Pac Man në videolojën e famshme.
Prekja e objekteve në ambiente publike është kthyer gjithashtu në shqetësim të madh. Bravat e dyerve konsiderohen si burim i mundshëm infektimi dhe për këtë arsye një supermarket në Finlandë testoi doreza që lejojnë hapjen e dyerve me krahë e jo duar.
Prekja mund të mos jetë një opsion edhe në ashensorë. Një qendër tregtare në Bangkok të Tajlandës i zëvendësoi butonat e ashensorëve me pedale që shtypen me këmbë.
Shpikja synon të minimizojë rrezikun e ekspozimit ndaj mikrobeve. Sisemi pedalues u mirëprit nga klientët të cilët mund ta përdornin ashensorin pa frikën e infektimit.
A dëshironi të riktheheni në punë? Atëherë mund ta vendosni stafin brenda një kutie kartoni.
Kjo është këshilla e kompanisë britanike Pallite, e cila po distancon punonjësit përmes pajisjeve të krijuara me karton të ricikluar. Kjo është një mënyrë për të shpëtuar biznesin nga falimentimi, duke ruajtur njëkohësisht shëndetin e stafit.
Shkencëtarët çekë shndërruan maskat e lira të zhytjes në maska me nivel të lartë mbrojtjeje për punonjësit e shëndetësisë dhe të tjerë që janë në frontin e parë të betejës kundër pandemisë së koronavirusit.
Ekipi i ekspertëve nga Universiteti Teknik Çek dhe një platformë vullnetarësh i shtuan filtra ushtarakë maskave të prodhuara për not, e që zakonisht gjenden për rreth 20 euro në dyqanet me produkte sportive.
Një grua e shurdhër nga Indonezia krijoi maska me një dritare plastike mbi gojë për të ndihmuar komunikimin, pasi u përball me vështirësi në zbatimin e rregullores së re.
Maska e saj lejon përdoruesit të lëvizin më lehtësisht buzët, çka e bën më të lehtë komunikimin me personat që nuk dëgjojnë.
Një robot i automatizuar që mund të kryejë tamponët, në mënyrë që punonjësit e shëndetësisë të mos eskpozohen ndaj rrezikut të infektimit.
Propozimi këtë herë vjen nga Danimarka. Shkencëtarët në Universitetin Jugor të Danimarkës shpresojnë se prototipi do të përdoret shpejt per të lehtësuar punën e profesionistëve të mjekësisë.
Një grup shkencëtarësh në një universitet në zë të Kinës dizenjuan një robot i cili mund të shpëtojë jetë njerëzish gjatë pandemisë së Covid-19.
Pajisja, e cila i ngjan më së shumti një krahu robotik me rrota, mund të kryejë skaner me ultratinguj, tampon dhe veprime të tjera tek pacientët me koronavirus.
Singapori prezantoi një qen robotik me katër këmbë për t’u kujtuar vizitorëve në parqe të ruajnë distancën sociale. Roboti i quajtur Spot patrulloi parkun si pjesë e një fushate për reduktimin e kontakteve mes qytetarëve.
Vrapuesit në Singapor u inkurajuan të praktikojnë distancimin social nga një robot vigjilent i cili i paralajmëronte ata të qëndronin në shtëpi.
Roboti që fliste, O-R3, ishte përdorur fillimisht për survejim të sigurisë dhe tani ka një rol më të gjerë si ambasador i distancimit social.
Po në Singapor, një tjetër robot inteligjent u dërgua në qendrat tregtare për të luftuar virusin pandemik përmes dritës.
Në vend që të spërkaste kimikate, roboti mbështetej plotësisht tek llambat e tij ultraviolet për të sterilizuar jo vetëm sipërfaqet, por edhe zona të tjera që do të ishin vështirë të arriheshin.
Në Korenë e Jugut, një robot humanoid, baristi Kabo, krijon koktejlet perfekte pasi mat me saktësi të gjithë përbërësit nga një arsenal likeresh e shurupësh.
Në Daejeon, një robot barist ndihmon qytetarët t’u përmbahen rregullave të distancimit social në publik, ndërsa një robot tjetër mund të prodhojë 60 lloje kafesh dhe t’ia shërbejë atyre klientëve në tryeza.
Në zyrat e Telekom të Koresë së Jugut, në qendër të Seulit, një robot autonom i pajisur me ekranizim LED, përshëndet vizitorët në holl.
Ai jo vetëm kontrollon temperaturën e trupit, por edhe spërkat duart dhe dyshemen me dezinfektues, duke këkruar gjithashtu mbajtjen e maskave.
Helmetat inteligjente ishin zgjidhja e Policisë së Dubait për të kontrolluar temperaturën e qindra personave në një minut, ndërsa shteti i gjirit përshkallëzon luftën kundër koronavirusit të ri.
Pajisja më e re Ugo, e kotrolluar edhe nga distanca të largëta, përdor rrezet ultraviolet për të vrarë viruset në dorezat e dyerve.
Roboti i krijuar nga kompania japoneze Mira Robotic mund të patrullojë godinën dhe mund të vetëpastrohet.
Roboti humanoid Pepper dhe një tjetër robot pastrues u instaluan në një hotel të Tokios ku po qëndronin pacientë me simptoma të lehta të koronavirusit.
Përforcimet e reja në hotel synonin të reduktonin barrën e infermierëve që kujdeseshin për pacientët.
Pepper priste të infektuarit në holl, ndërsa tjetri bënte sterilizimin e ambientit.
Gjithashtu, aeroporti ndërkombëtar i Hong Kongut mobilizoi robotë për të përballuar shtimin e qarkullimit në qershor.
Qëllimi kryesor është dezinfektimi i shpejtë i tualeteve me rreze ultraviolet dhe lëng spërkatës. E njëjta gjë u bë edhe për trenët dhe stacionet.
Indonezia përdori dronët dhe dhomat e dezinfektimit për të pastruar rrugët dhe qytetarët nga gjurmë të mundshme të virusit, pavarësisht paralajmërimeve të ekspertëve të shëndetësisë se një praktikë e tillë mund të shkaktojë irritim dhe probleme të frymëmarrjes.
Në një qendër për trajtimin e pacientëve me Covid-19, jo shumë larg kryeqytetit të Ruandës, Kigali, Akazuba, Ngabo dhe Ikizere qëndrojnë me devotshmëri në krye të detyrës.
Por, ata nuk janë punonjës të thjeshtë, por tre robotë të cilët kryejnë funksionin e infermierëve duke kontrolluar temperaturën e duke monitoruar pacientët që gjenden atje.
Në restorantin Dadawan në qytetin jugor holandez të Maastricht, një ekip i pazakontë është thirrur të ndihmojë teksa Holanda lehtëson masat e kufizimit.
Një treshe robotike kamarierësh të quajtur Ami, Aker dhe James, vërtiten sa para-mbrapa në një restorant aziatik duke shpërndarë pije e duke minimizuar lëvizjet që do t’u duhej njerëzve të bënin nëpër ambient.
Restorantet ju rikthyen metodave të reja të dërgimit te porosive gjatë periudhës së karantinës, me pasjijet e automatizuara që zëvendësuan njerëzit për të mundësuar zbatimin e distancimit social.
Gjithashtu, në Kolumbi, robotët po përdoren si mënyrë më e sigurtë për shpërndarjen e ushqimit tek personat që janë të detyruar të qëndrojnë në shtëpi për shkak të pandemisë koronavirus. Robotët kuti, që lëvizin në katër rrota, janë të pajisur me flamuj portokalli në antenat e tyre.
Një dron autonom nisi të shpërndante pajisje urgjente mjekësore tek spitalet në ishullin e Wight, në bregdetin jugor të Anglisë.
Pajisja ka një rreze veprimi prej 1 000 km dhe mund të mbajë ngarkesa deri në 100 kg.
Manna Aero në Irlandë duhej të shpërndante porositë e para në kampusin universitar të Dublinit në muajin mars, por pandemia e Covid-19 çoi në izolim të vendit dhe rrjedhimisht në mbyllje të programit pilot.
Brenda një jave kompania e dronëve testoi një koncept tërësisht të ndryshëm, duke shpërndarë ilaçe dhe pajisje të tjera të nevojshme tek personat e moshuar, të cilët ishin detyruar të qëndronin në shtëpi.
Universiteti i Biznesit në Tokio mbajti një ceremoni diplomimi për studentët në fund të muajit mars duke përdorur robëtë të kontrolluar nga larg, prej studentëve që gjendeshin në shtëpitë e tyre. /A2
