Policia e Shtetit përmes një njoftimi zyrtar tha se kishte zbuluar një laborator të gërmimit të kriptomonedhave si pjesë e aksionit kundër vjedhjes së energjisë elektrike në bashkëpunim me OSHEE.
Sipas njoftimit laboratori ishte në një objekt me qira dhe ishte në listën e abonentëve të dyshimtë për vjedhjen e energjisë elektrike. Policia nuk dha informacion se çfarë kriptomonedhe gërmohej ndërsa pajisjet e gjendura brenda objektit janë sekuestruar.
“Krujë/Operacioni policor i koduar “Kriptomonedha”, për goditjen e veprimtarisë kriminale në fushën e prodhimit të kriptomonedhave.
Operacioni i zhvilluar nga strukturat e DVP Durrës dhe Komisariati i Policisë Krujë, në bashkëpunim me Departamentin e Policisë Kriminale. Zbulohet dhe sekuestrohet një laborator që shërbente për prodhimin e kriptomonedhave. Procedohet penalisht pronari i ambientit, që ia kishte lëshuar me qira një personi tjetër.
Vijon puna për identifikimin dhe kapjen e personit që kishte ndërtuar laboratorin, si dhe të personave të tjerë të përfshirë në këtë veprimtari kriminale. Strukturat e DVP Durrës, në bashkëpunim me Komisariatin e Policisë Krujë dhe Departamentin e Policisë Kriminale, në vijim të punës për parandalimin dhe goditjen e paligjshmërisë, në bazë të informacioneve të disponuara nga këto struktura, se një shtetas kryente veprimtari kriminale në fushën e prodhimit të kriptomonedhave, kanë mirorganizuar punën dhe kanë zhvilluar operacionin policor të koduar “Kriptomonedha”.
Si rezultat, në katin e parë të një objekti në pronësi të shtetasit S. D., i cili ia kishte lëshuar këtë ambient me qira një personi tjetër, shërbimet e Policisë konstatuan një laborator që shërbente për prodhimin e kriptomonedhave. Në cilësinë e provës materiale u sekuestruan 7 pajisje elektronike për prodhimin e kriptomonedhave. Gjithashtu, në këtë banesë u konstatua lidhje e paligjshme e energjisë elektrike.
Shtetasi S. D. është proceduar penalisht në gjendje të lirë, për shkak të moshës.
Strukturat hetimore të DVP Durrës dhe të Komisariatit të Policisë Krujë, në bashkëpunim me Prokurorinë, vijojnë punën për identifikimin e personit që ka marrë me qira këtë ambient, si dhe të personave të tjerë të implikuar në këtë veprimtari kriminale. Materialet i kaluan Prokurorisë së Rrethit Gjyqësor Krujë, për veprime të mëtejshme”, sipas policisë.
Discussion about this post