Linja ajrore kombëtare australiane Qantas do të bëjë një ofertë kompensimi për gjashtë milionë pasagjerë, të dhënat personale të të cilëve u ‘vjedhën’ nga hakerat në një nga shkeljet më të mëdha të të dhënave në vitet e fundit në Australi.
Sulmi, i cili nga FBI i atribuohet grupit të hakerave Scattered Spider, ka synuar linjat ajrore vendase në ditët e fundit, duke fituar akses në emrat, datat e lindjes, numrat e telefonit dhe adresat e email-it të fluturuesve të shpeshtë.
Hakerët deri më tani nuk kanë filluar të shesin të dhënat e vjedhura në rrjetin e errët – një ‘treg’ popullor për kriminelët – dhe as nuk kanë kërkuar shpërblim nga Qantas.
Në një email drejtuar klientëve të prekur, të dërguar 12 orë pasi njoftoi Bursën për vjedhjen, drejtoresha ekzekutive e Qantas, Vanessa Hudson, tha se ishin marrë masa më të gjera sigurie për të forcuar monitorimin e sistemit dhe mbrojtjen e të dhënave.
“Ne e marrim këtë incident jashtëzakonisht seriozisht dhe po bashkëpunojmë me agjencitë qeveritare dhe ekspertë të pavarur të sigurisë kibernetike”, tha ajo. “Nëse identifikojmë ndonjë informacion të ri që është relevant, do ta ndajmë atë me klientët tanë ndërsa vazhdojmë të hetojmë”, shtoi ajo. Sulmi ndodhi nëpërmjet një telefonate të thjeshtë në qendrën e thirrjeve të Qantas në Manila, ku hakeri u paraqit si një punonjës i Qantas dhe fitoi akses në një platformë të dhënash të palës së tretë. Avokatja e Maurice Blackburn, Lizzie O’Shea, tha se shkelja ishte ende nën hetim, por ishte e qartë se klientët e Qantas ishin dëmtuar. Klientët e dëmtuar mund të paraqesin një ankesë në zyrën e Komisionit Australian të Informacionit, por ata do të duhet të presin gjatë për një përgjigje.
Discussion about this post