Google po i rikthen në vëmendje mënyrat alternative të ndërveprimit me orët inteligjente, duke sjellë kontrollin me gjeste tek Pixel Watch 4. Përditësimi më i ri i sistemit Wear OS 6.1 prezanton dy veçori të fokusuara te komoditeti dhe përdorimi pa duar: “double-pinch” dhe “wrist-turn”.
Me gjestin “double-pinch”, përdoruesi mjafton të bashkojë dy gishtat — një lëvizje e vogël që aktivizon funksione thelbësore të orës: përgjigjen e thirrjeve, menaxhimin e njoftimeve, kontrollin e muzikës, nisjen e një timer-i apo edhe kapjen e një fotoje. Kjo mund të jetë veçanërisht praktike në situata kur ekrani nuk është i aksesueshëm, si gjatë ushtrimit fizik, gatimit ose kur duart janë të zëna. Ndërkaq, gjesti “wrist-turn” rikthen një mënyrë dikur të njohur të ndërveprimit nga versionet më të hershme të Wear OS. Me një kthim të shpejtë të dorës, përdoruesi mund të mbyllë njoftime ose të heshtë një telefonatë, duke e bërë orën më të shpejtë dhe më intuitive në përdorim të përditshëm.
Këto veçori pritet të sjellin një ndjesi më natyrale ndërveprimi me pajisjen — një hap i vogël, por domethënës, drejt një smartwatch-i që kupton gjuhën e trupit. Për momentin, Google i ka rezervuar këto gjeste ekskluzivisht për Pixel Watch 4, dhe nuk ka konfirmime nëse modelet e mëparshme do të përfitojnë nga ky përditësim.
Discussion about this post