Industria globale e smartphonëve po përballet me një krizë të paprecedentë të komponentëve të memories, duke çuar në rënien më të madhe vjetore të dërgesave që nga kriza financiare e vitit 2008. Analistët e International Data Corporation (IDC) parashikojnë se dërgesat globale do të bien me rreth 12.9% në 2026, duke u ulur nga 1.26 miliardë njësi në 2025 në vetëm 1.12 miliardë njësi këtë vit.
Shkaku kryesor i këtij tronditjeje është kërkesa e lartë për çipe DRAM dhe NAND, e nxitur nga investimet masive në qendrat e të dhënave dhe teknologjitë e inteligjencës artificiale. Nabila Popal, drejtuese e hulumtimeve në IDC, thekson se ky nuk është një ngushtim i përkohshëm, por një rikonstruksion struktural i tregut, i cili ndryshon përbërjen e produkteve, portofolin e furnizuesve dhe dimensionin total të tregut. Një nga pasojat më të dukshme është rritja e çmimeve të smartphonëve. IDC parashikon se çmimi mesatar i shitjes së një telefoni do të rritet me rreth 14%, duke arritur në 523 dollarë për njësi, nivel më i lartë në histori. Kjo ndryshon balancën midis ofertës dhe kërkesës, duke e bërë segmentin e telefonëve nën 100 dollarë “të papërballueshëm ekonomikisht” për prodhuesit.
Ndërsa kompanitë e mëdha të segmentit premium mund të përballojnë këtë presion, prodhuesit më të vegjël dhe ata që operojnë në tregun e ulët do të përballen me sfida serioze. IDC parashikon një tkurrje më të madhe se 20% në tregjet e Lindjes së Mesme dhe Afrikës, ndërsa Kina dhe pjesa më e madhe e Azisë Paqësore do të shohin rënie respektive 10.5% dhe 13.1%. Ekspertët paralajmërojnë se ky deficit mund të zgjasë deri në mes të 2027-s, kur pritet një stabilizim i çmimeve të memorjes. Ndërkohë, prodhuesit janë të detyruar të zgjedhin mes rritjes së çmimeve ose uljes së specifikimeve të pajisjeve, duke sfiduar modelin klasik “më shumë specifikime për më pak para” që ka karakterizuar markat e vlerës së ulët.
Kriza e memorjes tregon se industria e smartphonëve po hyn në një periudhë të re, ku volumi i dërgesave është në rënie, çmimet në rritje, dhe konkurrenca për mbijetesë më e ashpër se kurrë. Konsolidimi i tregut dhe ndryshimi i strategjive të prodhuesve do të përcaktojnë se kush do të dalë i fortë dhe kush do të tërhiqet nga segmenti i telefonëve ekonomikë.
Discussion about this post