Helikopterin inovativ Airbus X6 është prioritet i dy shteteve superfuqi si janë Gjermania dhe Franca. Të dy shtetet do të shpenzojnë 377 milionë euro për të zhvilluar helikopterin.
Për projektin e modelit X6, Airbus do të bëjë kërkime të avancuara, zhvillim dhe inovacion të konsiderueshëm për të ndërtuar një helikopter të rëndë civil të teknologjisë së lartë. Në veçanti, motori binjak do të ketë një gamë më të gjerë veprimi, kombinuar me eficencë më të lartë karburanti, krahasuar me gjeneratën aktuale të helikopterëve.
Ai synon të thjeshtëzojë aksesin në platformat në ujëra të hapura, si dhe të lehtësojë misionet e kërkim shpëtimit, si edhe ato humanitare.
“Mbështetja franceze dhe gjermane do të stimulojë një investim të konsiderueshëm privat në këtë projekt. Ndihma do të sjellë një gjeneratë të re helikopterësh të rëndë inovativë, pa shkaktuar dëme në konkurrencë”, u shpreh Komisionerja Margrethe Vestager, pas aprovimit nga ana e Komisionit Europian të suportit të dy vendeve në këtë projekt.
Projekti i këtij helikopteri është i tillë, që paraqet rreziqe të larta dhe investimet e kërkuara tejkalojnë kapacitetet vetë financuese të Airbus.
X6 do të dizajnohet për të mbajtur 19 pasagjerë dhe do të ketë kontrolle gjysmëautomatike, një risi për Airbus. Kompania shpreson që helikopterët e parë X6 të jenë të gatshëm për tregje deri në vitin 2022-2023, ndërsa më pas do të zhvillojë edhe versione ushtarake të helikopterit inovativ.
Airbus është një nga kompanitë kryesore në aeronautikë dhe shërbimet e lidhura me të. Në vitin 2015 ajo gjeneroi 64,5 miliardë euro të ardhura dhe punëson rreth 136 mijë njerëz.
Discussion about this post