Një superkompjuter japonez ka zënë vendin e parë si kompjuteri më i fuqishëm në botë, sipas standardeve të vlerësimit të përbashkëta amerikano-europiane.
“Fugaku”, i ndërtuar nga kompanitë “Riken” dhe “Fujitsu Ltd”, në Kobe, Japoni, doli i parë në listën e 500 kompjuterëve më të mirë në botë.
Kjo ishte hera e parë që një superkompjuter japonez arrinte vendin e parë në renditje prej vitit 2011.
Kriteret e vlerësimit matin shpejtësinë e procesimit dhe performancën e përdorimit të inteligjencës artificiale.
“Fugaku” mund të realizojë 415 000 trilionë veprime në sekondë, duke u bërë kështu 2,8 herë më i shpejtë se superkompjuteri i ndërtuar nga IBM që mbante vendin e parë para tij, shkruan “A2”.
“Kjo teknologji e fjalës së fundit do të kontribuojë për të zgjidhur probleme te vështira të shoqërisë sonë, si pandemia e koronavirusit”, tha Satoshi Matsuoka, drejtori i Qendrës Riken për Shkencat Kompjuterike.
Kujtojmë se qeveritë i përdorin gjithashtu superkompjuterët për të simuluar shpërthime bërthamore dhe testime mbi përdorimin e armatimeve virtuale.
