Google do të bëjë të disponueshëm në muajt e ardhshëm aplikacionin “Android Earthquake Alerts”. Ky aplikacion do të zbulojë automatikisht lëkundjet e akseleometrit të secilit smartfon për të gjeneruar kështu paralajmërime në fazat fillestare të një tërmeti.
Platforma do të krijojë grafikë për lëvizjen e shtresave të Tokës duke alarmuar në rast të valëve që tejkalojnë pragun e rrezikut, shkruan News 18.
“Nëse telefoni zbulon diçka që mendon se mund të jetë një tërmet, ai dërgon një sinjal te serveri ynë i zbulimit të tërmetit, së bashku me vendndodhjen ku ka ndodhur lëkundja. Serveri pastaj kombinon informacione nga shumë telefonë për të kuptuar nëse po ndodh një tërmet,” thotë Marc Stogaitis, Inxhinier i Softuerit.
Google do të tregojë rezultate të lokalizuara për tërmete, bazuar në të dhënat e mbledhura nga smartfonat me sistem Android. Kjo do të jetë një periudhë e zgjatur prove për të parë nëse sistemi funksionon siç pritet, ku ju mund të kontrolloni nëse ka qenë në të vërtetë një tërmet pasi e keni ndier një të tillë.
Kur Google është i sigurt se sistemi i njoftimeve për tërmet në Android është mjaft i saktë, ai do t’u dërgojë përdoruesve në mënyrë aktive paralajmërime dhe alarme.
Google po bashkëpunon me Shërbimin Gjeologjik të Shteteve të Bashkuara dhe Zyrën e Shërbimeve të Urgjencës në Kaliforni, për të dërguar paralajmërime te përdoruesit në shtetin e Kalifornisë. Kjo do të mundësohet nga sistemi tashmë aktiv ShakeAlert që përdor gjithashtu sizmometrat e instaluar në tokë në të gjithë Kaliforninë. Lidhje të ngjashme do të krijohen edhe me shtete të tjera në botë.
