Kreu i Kishës Katolike shprehet i shqetësuar për ndikimin e inteligjencës artificiale në dinjitetin dhe identitetin njerëzor.
Papa Leo XIV ka refuzuar kategorikisht idenë për të krijuar një version digjital të tij — një avatar të fuqizuar nga inteligjenca artificiale — që do t’i lejonte besimtarët të zhvillonin “audienca virtuale” me Papën.
Kjo ide, e diskutuar së fundmi nga qarqe teknologjike dhe fetare, është cilësuar nga vetë Papa si një “trup bosh dhe i ftohtë” që nuk përfaqëson dot thelbin e njerëzimit.
Në një deklaratë publike, Papa Leo theksoi se “asnjë avatar nuk mund të zëvendësojë praninë njerëzore, marrëdhënien e gjallë dhe dimensionin shpirtëror që përfaqëson Papa për besimtarët”.
Ai sqaroi se nuk do të autorizojë kurrë krijimin e një entiteti virtual që flet në emrin e tij apo që jep përgjigje ndaj pyetjeve të njerëzve sikur të ishte ai vetë.
Ky qëndrim vjen në një moment kur inteligjenca artificiale po futet gjithnjë e më shumë në fusha të ndryshme të jetës, përfshirë arsimin, shëndetësinë, artin dhe madje edhe fenë.
Megjithatë, Papa paralajmëroi për rreziqet që sjell kjo teknologji, sidomos kur bëhet fjalë për manipulimin e identitetit njerëzor dhe krijimin e një bote ku kufijtë mes realitetit dhe simulimit zbehen.
“Teknologjia nuk duhet të shërbejë për të zëvendësuar marrëdhëniet tona njerëzore dhe as për të ndërtuar iluzione që mund të çorientojnë besimtarët”, tha ai.
Avataret e fuqizuar nga AI mund të ndihmojnë në shpërndarjen më të shpejtë të mesazheve fetare, të ofrojnë akses më të gjerë te besimtarët dhe të përdoren për edukim ose arkivim historik. Nga ana tjetë përdorimi i AI për të imituar figurat fetare rrezikon të krijojë konfuzion, manipulim ose keqpërdorim. Ekziston frika se mund të dëmtohet dinjiteti i figurës së Papës dhe të zbehet marrëdhënia autentike midis udhëheqësve shpirtërorë dhe besimtarëve.
Discussion about this post