Për vite me radhë, markat dhe bizneset kanë luftuar për një vend në faqen e parë të Google. Sot, megjithatë, loja po ndryshon me shpejtësi. Në vend që të kërkojnë “dhurata për Krishtlindje” ose “restorante afër meje”, gjithnjë e më shumë përdorues po pyesin chatbotët e inteligjencës artificiale, si ChatGPT apo Gemini, për sugjerime dhe rekomandime.
Ky ndryshim po lind një term të ri që mund të zëvendësojë SEO-n tradicionale: GEO – Generative Engine Optimization, optimizimi për motorët gjenerativë.
Në thelb, GEO përqendrohet jo tek renditja në rezultatet e kërkimit, por tek shfaqja si burim i besueshëm në përgjigjet që japin modelet gjenerative të AI-së.
Sipas analizave të industrisë, tregu i GEO-s pritet të arrijë vlerën e 850 milionë dollarëve gjatë vitit 2025 – një treg i ri që po rritet paralelisht me përdorimin masiv të chatbotëve.
Imri Marcus, drejtues i agjencisë së specializuar në GEO “Brandlight”, thotë se lidhja mes përmbajtjes që dominon Google-in dhe asaj që përdorin modelet gjenerative është gjithnjë e më e dobët.
“Nëse dikur 70% e burimeve të përmendura nga AI përputheshin me rezultatet e para të Google, tani kjo shifër është më pak se 20%,” – shpjegon ai.
Ndryshe nga algoritmet klasike të kërkimit që vlerësonin përmbajtjet e gjata e të detajuara, motorët gjenerativë preferojnë përmbajtje të qarta, të strukturuara dhe të shkurtra.
Formatet si listat, seksionet “Pyetje & Përgjigje” (FAQ) apo përshkrimet koncize kanë më shumë gjasa të përfshihen në përgjigjet e AI-së.
Shembull: një artikull që dikur titullohej “Pse është e mirë marka X”, sot duhet të trajtojë pyetje specifike si “A ka Chevy Blazer një autonomi më të madhe se Silverado?”.
Sa më konkrete pyetjet, aq më e lehtë për chatbotët të sugjerojnë një markë apo produkt të caktuar.
Gjigantë si Estée Lauder Companies po investojnë tashmë në mënyra të reja për t’u bërë “të dukshme” për inteligjencën artificiale.
Qëllimi nuk është vetëm të shiten më shumë produkte, por të sigurohen që informacioni zyrtar, përshkrimet e sakta dhe përmbajtja e verifikuar të mund të lexohen dhe të përdoren nga sistemet e AI-së. Në praktikë, kjo do të thotë të ndërtosh përmbajtje që chatbotët mund ta citojnë dhe t’u përgjigjen pyetjeve të përdoruesve me burimin tënd si referencë.
Në një kthesë ironike, vetë AI po përdoret për të krijuar përmbajtje që më pas përdoret nga motorët gjenerativë për t’u trajnuar. Marcus pranon se, ndonëse në fillim besohej se modelet nuk do të trajnoheshin mbi tekste të krijuara nga AI, “praktika po tregon të kundërtën: përmbajtja gjeneruar nga AI është pjesë e zinxhirit të të dhënave që vetë AI mëson”.
Në këtë mënyrë, kufiri mes përmbajtjes “njerëzore” dhe asaj “gjenerative” po bëhet çdo ditë më i paqartë. Ajo që mbetet thelbësore është cilësia, qartësia dhe struktura e informacionit — vlera që e bëjnë një tekst më të lehtë për t’u “kuptuar” nga sistemet gjenerative.
Për bizneset që duan të mbeten përpara, GEO s’është më opsion — është domosdoshmëri.
Në vend që të luftojnë për klikime, markat duhet të luftojnë për përmendje në përgjigjet e AI-së.
Në një botë ku përdoruesit nuk “kërkojnë”, por “pyesin”, ai që përgjigjet i pari fiton vëmendjen.
Discussion about this post