Fintech-u japonez JPYC ka prezantuar stablecoin-in e parë në vend, të mbështetur një për një me depozita bankare dhe bono shtetërore, duke i dhënë Japonisë rolin e radhës në garën ndërkombëtare të tregut të stablecoin-eve. Monedha, e quajtur JPYC, u lançua zyrtarisht të hënën dhe ka një kurs fiks 1:1 me yenin japonez.
Presidenti i kompanisë, Noriyoshi Okabe, e përshkroi këtë zhvillim si “një moment historik për valutën japoneze”. Ai shtoi se shtatë kompani tashmë kanë shprehur interes për ta integruar stablecoin-in në shërbimet e tyre.
Krahas monedhës digjitale, JPYC ka lançuar edhe platformën JPYC EX, e cila mundëson emetimin dhe konvertimin e token-it. Përdoruesit mund të depozitojnë yen përmes transfertave bankare dhe të marrin JPYC në portofolat e tyre digjitale, ose t’i tërheqin përsëri në formë fiat.
Platforma operon nën ligjin japonez për parandalimin e pastrimit të parave dhe përfshin verifikim të rreptë të identitetit dhe transaksioneve.
JPYC synon të arrijë një balancë emetimi prej 10 trilion yenësh brenda tre viteve të ardhshme dhe të krijojë “një infrastrukturë të re sociale përmes stablecoin-eve”.
Aktualisht, tregu global i stablecoin-eve, i dominuar nga dollari amerikan me USDT dhe USDC, ka arritur një kapitalizim prej mbi 308 miliardë dollarësh.
Në Japoni pritet të futen edhe lojtarë të tjerë në këtë treg. Monex Group po përgatitet të lansojë stablecoin-in e vet të lidhur me yenin, ndërsa Mitsubishi UFJ, Sumitomo Mitsui dhe Mizuho Bank po planifikojnë të emetojnë së bashku një stablecoin përmes platformës Progmat.
Ndërkohë, Agjencia e Shërbimeve Financiare të Japonisë mund të rishikojë rregulloret për t’u lejuar bankave që të zotërojnë dhe të investojnë në kriptovaluta si Bitcoin.
Discussion about this post