Autoritetet australiane kanë ngritur akuza penale ndaj një burri 42-vjeçar, i cili dyshohet se qëndron pas një skeme mashtrimi me investime në kriptovaluta, duke shënjestruar kryesisht persona të moshuar dhe të pambrojtur financiarisht. Hetimi, i udhëhequr nga New South Wales Police Force, ka zbuluar se viktimat humbën rreth 3.5 milionë dollarë australianë në një periudhë disa mujore.
Sipas policisë, mashtrimi nisi në fund të vitit të kaluar, kur viktimat u kontaktuan përmes rrjeteve sociale dhe platformave online me oferta që premtonin kthime të shpejta dhe të sigurta nga investime në kriptovaluta. Hetuesit thonë se komunikimi ishte i strukturuar për të ndërtuar besim, duke përdorur gjuhë profesionale dhe materiale që imitonin platforma legjitime investimi. Pasi bindeshin të investonin, viktimat udhëzoheshin të transferonin paratë drejt një faqeje që paraqitej si shërbim pagesash dhe investimesh dixhitale. Në realitet, sipas autoriteteve, fondet nuk përdoreshin për investime të vërteta, por kalonin përmes disa portofolesh kriptovalutash dhe shërbimesh ndërmjetëse, në përpjekje për të fshehur origjinën dhe destinacionin e tyre.
Policia ekzekutoi urdhra kontrolli në disa lokacione në Sydney, duke sekuestruar pajisje elektronike, dokumente financiare dhe të dhëna digjitale që pritet të përdoren si prova në gjykatë. I dyshuari kryesor u lirua me kusht, por do të paraqitet para gjykatës në javët në vijim për t’u përballur me akuzat që lidhen me përfitime nga veprimtari e paligjshme. Autoritetet thanë se mbi 190 persona dyshohet se janë prekur nga skema, me shumicën e viktimave që i përkasin grupmoshës së tretë. Përfaqësues të policisë paralajmëruan se mashtrimet e investimeve po bëhen gjithnjë e më të sofistikuara, duke shfrytëzuar interesin në rritje për kriptovalutat dhe mungesën e informacionit të mjaftueshëm tek investitorët e vegjël. Rasti vjen në një kohë kur Australia po përballet me një rritje të ndjeshme të krimeve financiare online. Autoritetet u bënë thirrje qytetarëve të tregojnë kujdes ndaj ofertave që premtojnë fitime të garantuara dhe të verifikojnë çdo platformë investimi përpara se të transferojnë fonde.
Discussion about this post