Google ka lançuar mjete dhe veçori të reja si për lexuesit ashtu edhe për gazetarët, të krijuara për t’i dhënë rëndësi më të madhe lajmeve të gazetave dhe faqeve lokale, të konsideruara autoritare.
Në karuselin e Google News, pas kërkimit për një term ose frazë (për shembull “Infeksionet Covid”), këto lajme do të shfaqen së bashku me burimet kombëtare, duke marrë kështu një rëndësi më të madhe. Gjigandi amerikan ka lançuar risinë pikërisht për të dhënë informacione të verifikuara mbi temën e pandemisë, si për infeksionet, ashtu edhe për vaksinat, që nga përqindjet e deri tek indikacionet e autoriteteve shëndetësore vendase.
“Përditësimi i algoritmit do të sigurojë që lundruesit të kenë akses në histori të certifikuara lokale ndërsa kërkojnë lajme më të gjera. Kjo do të ndihmojë faqet dhe botuesit lokalë të arrijnë një audiencë më të gjerë,” shpjegoi Google.
Një funksion tjetër ka të bëjë me aktivizimin e sensorit GPS në telefonat inteligjentë, tabletët dhe kompjuterët. Duke e aktivizuar atë, siç do të bëhej në rastin e përdorimit të navigatorit në telefon, Google do të jetë në gjendje të ofrojë rezultate kërkimi edhe më të sakta, duke përfshirë koordinatat që lidhen me vendin ku ndodhet një përdorues.
“Për shembull – shpjegon ekipi – nëse jeni në Detroit dhe kërkoni diçka për futbollin, ne do t’ju tregojmë rezultatet për ekipet lokale, nga shkolla e mesme në kolegj, në vend që të shfaqim vetëm lojërat e ekipeve profesionale”.
Një integrim i mëtejshëm do të vendosë gjithashtu tweet-et e dërguara nga llogaritë e tyre zyrtare së bashku me titujt dhe lidhjet e faqeve dhe gazetave të kërkuara, për të ofruar përditësime në kohë reale për çdo lajm në zhvillim. Përditësimi i algoritmit tashmë është përhapur globalisht, por do të zbatohet gradualisht në vende të ndryshme./zero1.al
Discussion about this post