Aplikacioni i mesazheve Telegram do t’u dorëzojë autoriteteve gjyqësore adresat IP të lidhjeve për të gjurmuar identitetin e njerëzve dhe numrat e telefonit të përdoruesve në rast të procedimeve ligjore kundër tyre.
Këtë e ka bërë të ditur themeluesi i Telegram, Pavel Durov, përmes një postimi në kanalin e tij. Një ndryshim për platformën që mori kritika për përmbajtjen e saj, sepse bashkëpunonte pak me autoritetet dhe jepte të dhëna përdoruesi vetëm në rast dyshimi për aktivitete terroriste.
Lajmi vjen pasi Durov u arrestua në Paris në fund të gushtit me akuzën se ishte bashkëpunëtor i aktiviteteve të paligjshme të lejuara nga Telegram. Më pas ai u lirua me kusht me ndalimin e daljes nga territori francez dhe detyrimin për t’u paraqitur në polici dy herë në javë.
“Ne nuk do të lejojmë që aktorët e këqij të rrezikojnë integritetin e platformës sonë gati miliardë përdoruesish”, tha Durov në mesazhin e tij. Sipas themeluesit të Telegram, platforma ka punësuar një ekip moderatorësh javët e fundit, të cilët, duke përdorur inteligjencën artificiale, e kanë bërë funksionin e kërkimit më të sigurt. “E gjithë përmbajtja problematike në kërkim nuk është më e aksesueshme”, shton Durov i cili u kërkon përdoruesve t’i raportojnë në profilin @SearchReport nëse është e nevojshme.
Discussion about this post