Google ka lançuar përditësimin e radhës për telefonat e tij Pixel, i cili sjell disa përmirësime të dukshme në përvojën e përdoruesit. Përditësimi “Pixel Drop” për nëntorin 2025 përfshin një mënyrë të re kursimi energjie për Google Maps, opsione kreative redaktimi për fotot përmes AI-s, dhe njoftime më të zgjuara në ekran.
Një nga risitë më të rëndësishme është modaliteti i kursimit të baterisë për Google Maps. Ky funksion errëson ekranin, por vazhdon të shfaqë drejtimin dhe kthesën e ardhshme, duke kursyer ndjeshëm energjinë gjatë navigimit. Sipas Google, përdoruesit e Pixel 10 mund të përfitojnë deri në katër orë shtesë jetëgjatësi baterie.
Ndërkohë, aplikacioni Google Photos tani përfshin funksionin “Help me edit”, që përdor inteligjencën artificiale për të modifikuar imazhe përmes komandave me tekst. Përdoruesit mund t’i kërkojnë sistemit: “hiq syzet”, “bëj që të buzëqeshë” ose “hap sytë”, dhe AI-ja i realizon automatikisht ndryshimet. Kjo veçori është aktualisht në dispozicion në SHBA, Britani, Indi, Australi dhe Kanada.
Përditësimi sjell gjithashtu njoftime më inteligjente: Pixel tani thekson kontaktet e rëndësishme, sinjalizon zonat emergjente me shenjën “Mbani një sy në këtë zonë” dhe do të shtojë një funksion që fik automatikisht njoftimet me prioritet të ulët — një risi që do të lansohet në dhjetor.
Ky përditësim tregon se Google po i kushton gjithnjë e më shumë vëmendje lehtësisë së përdorimit, duke i bërë telefonat Pixel jo vetëm më të mençur, por edhe më praktikë në përditshmëri. Në një treg ku konkurrenca me Samsung dhe Apple është e fortë, këto përmirësime mund ta ndihmojnë kompaninë të ruajë epërsinë tek përdoruesit besnikë të Android-it.
Discussion about this post