Meta ka njoftuar një ndryshim të rëndësishëm për përdoruesit e Facebook dhe Instagram në Bashkimin Evropian: nga janari 2026, ata do të kenë mundësinë të zgjedhin një version të platformave me reklama më pak të personalizuara. Ky opsion, i quajtur “ad-light”, synon të ofrojë më shumë kontroll mbi të dhënat personale dhe të zbusë tensionet me rregullatorët europianë.
Ky hap vjen pasi Komisioni Evropian gjobiti Meta-n në prill 2025, duke deklaruar se modeli “paguaj ose prano ndjekjen për reklama” shkelte rregullat e reja të tregjeve digjitale. Rregullatorët e konsideruan atë një zgjedhje jo të drejtë për përdoruesit, të cilët duhej të sakrifikonin privatësinë ose të paguanin për një përvojë pa reklama. Me opsionin “ad-light”, përdoruesit do të shohin ende reklama, por ato nuk do të bazohen në një gamë të gjerë të dhënash personale. Në momentin e hyrjes në aplikacion, përdoruesve do t’u shfaqet një njoftim që u lejon të zgjedhin mes reklamave të personalizuara ose një versioni më të kufizuar të tyre.
Komisioni Evropian e ka cilësuar këtë si një lëvizje pozitive, por jo të mjaftueshme për të mbyllur automatikisht hetimin. Institucionet do të monitorojnë me kujdes si e zbatojnë Meta ndryshimin dhe se si ndikohen përdoruesit — duke parashikuar se zgjedhjet e tyre mund të shërbejnë si precedent për platformat e tjera teknologjike që operojnë në BE. Për Meta-n, propozimi është një përpjekje për të shmangur masa më të ashpra rregullatore dhe për të stabilizuar marrëdhënien me Brukselin. Për përdoruesit, është një mundësi e re për të ruajtur më shumë kontroll, pa hequr dorë nga përvoja e përdorimit të rrjeteve sociale.
Discussion about this post