Rrjeti më i madh social Facebook do të pësojë ndryshime të mëdha, lidhur me shfaqjen e postimeve në kryefaqe.
Kështu, Facebook do të shfaqë më pak postime nga bizneset, markat apo mediet, ndërsa nga ana tjetër do t’u japë avantazh postimeve me përmbajtje familjare dhe miqësore, shpjegoi Mark Zuckerberg.
Si pasojë e këtij ndryshimi, organizatat e ndryshme në Facebook do të shohin që popullariteti i postimeve të tyre do të zvogëlohet. Ndryshimet do të hyjnë në fuqi gjatë javëve të ardhshme.
“Ne kemi marrë shumë reagime nga komuniteti ynë ku ka pasur ankesa se përmbajtjet publike, si postime nga bizneset, markat dhe mediet po “zhdukin” postimet me përmbajtje personale, që na çon ne në një lidhje më të ngushtë me njëri-tjetrin”, tha Zuckerberg.
Zuckerberg tha se ai dhe skuadra e tij ndjejnë një përgjegjësi për të siguruar që Facebook kontribuon në mirëqenien e njerëzve.
Nëse përmbajtja publike duhet të promovohet, kjo duhet të shihet si nxitje për ndërveprimin e komunitetit.
“Duke bërë këto ndryshime, besoj që koha që do të kalojnë njerëzit në Facebook do të jetë më e vlefshme”, tha Zuckerberg.
Në një postim të mëparshëm, Zuckerberg u zotua të “rregullonte” Facebook-un në vitin 2018, duke thënë se donte të siguronte që përdoruesit të ishin të mbrojtur nga abuzimi dhe se koha e kaluar në këtë rrjet social do të ishte një kohë e shpenzuar mirë.
Ai gjithashtu premtoi të mbrojë Facebook nga shtetet kombe. Kohët e fundit disa aktorë, duke përfshirë Rusinë, janë munduar të manipulojnë përmbajtjen në rrjetin social.
“Është padyshim një ndryshim i rëndësishëm”, tha Laura Hazard Owen në “Nieman Journalism Lab,” të Universitetit të Harvardit.
“Kjo do të ndikojë shumë te botuesit. Do të ketë shumë më pak lajme që mbysin postimet e njerëzve”, tha ajo, ndërsa shtoi se Facebook nuk ishte shumë i qartë se kujt do t’i jepte prioritet pas ndryshimeve që do të bëhen. TIRANA TODAY
Discussion about this post