Një gjykatë në Gjermani ka vendosur kundër kompanisë amerikane OpenAI, duke e shpallur fajtore për shkelje të ligjit të të drejtave të autorit. Sipas vendimit, kompania ka përdorur materiale muzikore të mbrojtura nga licenca pa miratim për trajnimin e modeleve të saj të inteligjencës artificiale, përfshirë ato që fuqizojnë ChatGPT.
Padia u ngrit nga GEMA, shoqata gjermane për të drejtat e muzikës, e cila përfaqëson mijëra artistë, kompozitorë dhe producentë. GEMA akuzoi OpenAI se kishte “gërmuar” dhe përfshirë në bazat e të dhënave materiale muzikore të mbrojtura me të drejtë autori, pa marrë leje nga mbajtësit e këtyre të drejtave.
Gjykata gjermane vendosi në favor të GEMA-s dhe urdhëroi OpenAI të pagojë dëmshpërblim, duke theksuar se përdorimi i përmbajtjeve të tilla në trajnimin e modeleve të AI-së “nuk mund të justifikohet si përdorim i drejtë” apo si “përdorim për qëllime kërkimore”. Vendimi u konsiderua një fitore e madhe për krijuesit e përmbajtjes në Evropë.
Në një deklaratë pas vendimit, GEMA tha se “ky është një hap i rëndësishëm drejt vendosjes së rregullave të qarta për industrinë e inteligjencës artificiale, e cila duhet të respektojë të njëjtat ligje që vlejnë për çdo sektor tjetër krijues”.
Nga ana tjetër, OpenAI ka bërë të ditur se do të rishikojë vendimin dhe po shqyrton opsionet ligjore për apelim. Kompania nuk ka pranuar fajin, por ka deklaruar se “mbetet e angazhuar për të bashkëpunuar me rregullatorët dhe krijuesit për të gjetur zgjidhje të balancuara midis inovacionit dhe mbrojtjes së të drejtave të autorit”.
Vendimi shihet si një paralajmërim për të gjitha kompanitë që zhvillojnë modele të mëdha të AI-së, të cilat përdorin sasi të mëdha të dhënash nga interneti për trajnim. Ekspertët ligjorë thonë se ky rast mund të ndikojë edhe në vendime të ardhshme në Bashkimin Europian, ku po diskutohen rregulla më të ashpra për transparencën e trajnimit të modeleve të inteligjencës artificiale.
Ky është rasti i parë i madh në Evropë ku një kompani e teknologjisë dënohet për përdorimin e paautorizuar të përmbajtjes së mbrojtur gjatë procesit të trajnimit të AI-së — një vendim që mund të ndryshojë mënyrën si zhvillohet dhe licencohet inteligjenca artificiale në vitet e ardhshme.
Discussion about this post