Google ka lançuar veçorinë Scheduled Actions, një hap që e afron inteligjencën artificiale me rolin e një asistenti personal të pavarur. Përdoruesit mund t’i kërkojnë Gemini-t të kryejë veprime në një kohë të caktuar, si përmbledhje email-esh çdo mëngjes, ide për darkën në mbrëmje, përditësime lajmesh apo njoftime që lidhen me detyra të rëndësishme. Mjafton të shkruash në gjuhë të natyrshme se çfarë dëshiron të bëjë AI-ja dhe kur duhet ta bëjë, dhe sistemi e ruan automatikisht detyrën
Pasi vendoset një veprim, Gemini e ekzekuton edhe nëse përdoruesi nuk po bisedon me të në atë moment. Njoftimet vijnë me email ose direkt në pajisje. Funksionaliteti është i disponueshëm në planet AI Pro dhe AI Ultra, me deri në dhjetë veprime të planifikuara aktivisht në të njëjtën kohë
Edhe ChatGPT po ecën në të njëjtën linjë me funksionin Tasks, që lejon krijimin e detyrave të përsëritura nga aplikacioni ose versioni web. Përdoruesit mund të zgjedhin si duan të njoftohen dhe të menaxhojnë çdo detyrë nga një panel i dedikuar. Ashtu si te Gemini, edhe këtu filozofia është e njëjtë: AI nuk përgjigjet vetëm kur pyetet, por vepron në mënyrë proaktive
Veçoria përfaqëson një ndryshim të madh në mënyrën se si përdoruesit mund ta përdorin AI-në për produktivitet ditor. Ajo e kthen inteligjencën artificiale në një shërbim të vazhdueshëm që kujdeset për informacionet dhe detyrat rutinë, ndërsa përdoruesi merret me gjërat që kanë vërtet rëndësi. Zgjerimi i aksesit mund të jetë gradual, por drejtimi është i qartë: AI po kalon nga “përgjigje sipas kërkesës” te “asistent i autonomizuar”
Discussion about this post