Microsoft po ndryshon mënyrën se si funksionon cloud gaming për abonentët e Xbox Game Pass. Duke nisur nga nëntori, lojërat në cloud nuk do të jenë më të pakufizuara për abonentët dhe çdo paketë Game Pass do të ketë një limit mujor.
Abonentët e Game Pass Ultimate do të kenë 15 orë streaming në muaj, ata të Premium 10 orë, ndërsa abonentët e Essential vetëm 5 orë. Aktualisht, përdoruesit që kanë të drejtë të përdorin Xbox Cloud Gaming mund të luajnë pa këto kufizime mujore.
Microsoft thotë se ndryshimi lidhet me rritjen e kostove të shërbimit, pasi numri i përdoruesve dhe koha që ata kalojnë duke luajtur në cloud janë rritur. Kompania vlerëson se ndryshimi do të prekë rreth 4 për qind të abonentëve të Game Pass.
Pasi të mbarojnë orët e përfshira në abonim, lojtarët do të mund të blejnë kohë shtesë përmes Xbox Store. Microsoft ende nuk ka bërë të ditur çmimet e këtyre orëve shtesë, por premton më shumë detaje përpara se ndryshimi të hyjë në fuqi. Në të njëjtën kohë, Xbox po hap një mundësi të re: nga nëntori, përdoruesit do të mund të blejnë orë cloud gaming edhe pa pasur një abonim Game Pass dhe t’i përdorin ato për lojërat që zotërojnë dhe që mbështeten nga shërbimi.
Ndryshimi shënon fundin e një prej avantazheve kryesore të Game Pass për lojtarët që përdorin rregullisht cloud gaming. Për Microsoft, synimi është të kontrollojë kostot dhe të vazhdojë investimet në performancën dhe qëndrueshmërinë e shërbimit.
Discussion about this post