Meta nuk ka arritur ta ndalë një nga betejat më të mëdha ligjore me të cilat është përballur ndonjëherë. Gjykata federale ka lejuar që çështja e ngritur nga shtetet amerikane mbi sigurinë e fëmijëve dhe adoleshentëve në platformat e kompanisë të vazhdojë drejt gjyqit.
Në qendër të çështjes janë akuzat se Meta ka projektuar Facebook dhe Instagram me karakteristika që mund të nxisin përdorim të varësisë dhe më pas ka mashtruar publikun lidhur me sigurinë e këtyre platformave. Meta i mohon akuzat dhe argumenton se pretendimet e paditësve nuk mbështeten nga provat. Ajo që e ka bërë çështjen veçanërisht të bujshme është shuma prej 1.4 trilionë dollarësh që katër shtete si Kalifornia, Kolorado, Kentaki dhe Nju Xhersi, kërkojnë si penalitete nëse fitojnë. Shifra, e cila është afërsisht sa kapitalizimi i tregut të Meta-s, nuk është një gjobë e vendosur nga gjykata. Ajo përfaqëson mënyrën se si shtetet kanë llogaritur penalitetet e mundshme sipas ligjeve të tyre.
Sipas dokumenteve të gjykatës, shtetet e kanë bazuar përllogaritjen te numri i shkeljeve dhe gjobat e përcaktuara nga ligjet përkatëse. Numri i shkeljeve lidhet me vlerësimin e përdoruesve të rinj që pretendohet se janë prekur nga praktikat e kompanisë.
Çështja është edhe më e gjerë. Në total, 29 shtete kanë ngritur padi federale kundër Meta-s, duke pretenduar, ndër të tjera, se kompania ka mbledhur të dhëna nga fëmijët pa pëlqimin e duhur prindëror, në shkelje të ligjeve federale për mbrojtjen e privatësisë së fëmijëve. Një gjykatëse federale kishte refuzuar më herët kërkesën e Meta-s për ta rrëzuar çështjen, duke argumentuar se ekzistojnë ende mosmarrëveshje faktike mbi mënyrën se si janë projektuar platformat dhe ndikimin e tyre te përdoruesit e rinj.
Rasti vjen pas një tjetër goditjeje ligjore për Meta-n. Në mars, një juri në New Mexico e urdhëroi kompaninë të paguante 375 milionë dollarë, pasi e gjeti përgjegjëse për mashtrimin e konsumatorëve lidhur me sigurinë e platformave. Pavarësisht se 1.4 trilionë dollarët nuk janë një detyrim i vendosur, vetë madhësia e kërkesës tregon se beteja ligjore për sigurinë e të rinjve po hyn në një fazë të re.
Për Meta-n, gjyqi nuk është thjesht një betejë për para. Është një test i madh mbi sa përgjegjësi duhet të mbajnë platformat sociale për mënyrën se si janë projektuar dhe për pasojat e tyre te përdoruesit e rinj.
Discussion about this post