Një nga sistemet më të mëdha publike shëndetësore në Shtetet e Bashkuara është goditur nga një sulm masiv kibernetik që ka komprometuar të dhënat personale dhe biometrike të të paktën 1.8 milionë njerëzve. NYC Health + Hospitals konfirmoi se hacker-at kishin akses në rrjetin e saj për disa muaj përpara se sulmi të zbulohej në fillim të shkurtit. Institucioni, që menaxhon spitale dhe klinika publike në New York dhe shërben për mbi një milion banorë çdo vit, deklaroi se sulmuesit kopjuan të dhëna mjekësore, informacione sigurimesh, dokumente identiteti dhe madje skanime biometrike si gjurmë gishtash dhe gjurmë pëllëmbe.
Sipas raportimit, sulmi ndodhi përmes një kompanie të jashtme partnere, identiteti i së cilës nuk është bërë publik. Hacker-at kishin akses në sistem nga nëntori 2025 deri në shkurt 2026, periudhë gjatë së cilës u kopjuan skedarë të shumtë nga rrjeti i organizatës. Ekspertët e sigurisë po e konsiderojnë incidentin veçanërisht serioz për shkak të përfshirjes së të dhënave biometrike. Ndryshe nga fjalëkalimet apo kartat bankare, gjurmët e gishtave nuk mund të ndryshohen pasi komprometohen. Deri tani nuk është e qartë nëse biometria e pacientëve ishte pjesë e databazës apo vetëm ajo e punonjësve dhe aplikantëve për punë.
NYC Health + Hospitals tha se rrjeti u sigurua pasi sulmi u identifikua dhe se incidenti është raportuar pranë Departamentit Amerikan të Shëndetësisë dhe Shërbimeve Njerëzore. Organizata nuk ka konfirmuar ende nëse është paguar ndonjë shpërblim apo nëse të dhënat janë publikuar online. Sulmi është një tjetër sinjal alarmi për sektorin shëndetësor, i cili është kthyer në një nga objektivat kryesore të grupeve kriminale kibernetike për shkak të sasisë së madhe të të dhënave sensitive që ruan.
Discussion about this post