Pas gati tre vitesh pritjeje, JLR ka prezantuar më në fund Range Rover Electric, modelin e parë plotësisht elektrik të markës ikonike. I prezantuar fillimisht në vitin 2023 dhe i planifikuar për të dalë në rrugë një vit më vonë, SUV-i u vonua për shkak të testeve të zgjeruara të zhvillimit. Tani, kompania thotë se është gati për tregun.
Range Rover Electric nuk duket se ka ardhur për të bërë kompromis me performancën. Dy motorët elektrikë prodhojnë deri në 542 kuaj fuqi dhe 850 Nm çift rrotullues, ndërsa bateria 118.5 kWh mund të karikohet nga 10 në 80 për qind në vetëm 22 minuta. Autonomia maksimale e deklaruar arrin rreth 599 kilometra sipas standardit WLTP, ndërsa në përdorim real JLR pretendon deri në 536 kilometra.
Por ajo që e veçon këtë model është aftësia për të ruajtur karakterin e një Range Rover-i edhe jashtë asfaltit. Sistemi i menaxhimit të tërheqjes kontrollon rrëshqitjen shumë më shpejt se sistemet tradicionale, ndërsa automjeti mund të përballojë kalimin në ujë deri në 900 milimetra. Sipas JLR, janë regjistruar më shumë se 300 patenta për këtë automjet, më shumë se për çdo Range Rover tjetër. Çmimi, natyrisht, mbetet në territorin e luksit. Në Britani, modeli fillestar kushton rreth 154 mijë paund, ndërsa versionet më të avancuara kalojnë 225 mijë paund. Në SHBA, çmimi nis nga rreth 138 mijë dollarë.
Pas gjithë këtyre vonesave, sfida e vërtetë për JLR tani është të bindë blerësit e luksit se një Range Rover elektrik mund të ofrojë të njëjtën përvojë, prestigj dhe aftësi që presin nga marka vetëm pa motorin tradicional me djegie.
Discussion about this post