Ndërsa kompanitë teknologjike investojnë miliarda dollarë në ndërtimin e infrastrukturës që mbështet inteligjencën artificiale, një nga figurat më të njohura të aktivizmit mjedisor në Shtetet e Bashkuara po kërkon më shumë transparencë për mënyrën se si po zhvillohet ky zgjerim.
Erin Brockovich, e njohur ndërkombëtarisht për betejën e saj kundër ndotjes së ujit nga kompania Pacific Gas & Electric, ka nisur një fushatë të re të fokusuar te qendrat e të dhënave (data centers) dhe ndikimi që ato mund të kenë mbi komunitetet përreth. Sipas saj, problemi kryesor që po raportojnë qytetarët nuk janë domosdoshmërisht zhurma, konsumi i ujit apo rritja e faturave të energjisë, por mungesa e transparencës në procesin e planifikimit dhe miratimit të këtyre projekteve. Së fundmi, Brockovich lançoi një platformë online që përfshin një hartë të qendrave të të dhënave në të gjithë SHBA-në. Projekti mbështetet në raportime të komuniteteve lokale dhe synon të dokumentojë shqetësimet e banorëve për objektet ekzistuese dhe ato që janë në ndërtim ose planifikim. Vetëm gjatë muajit të parë të funksionimit, iniciativa ka mbledhur mijëra raportime nga qytetarë në mbarë vendin.
Sipas Brockovich, ajo nuk po zhvillon një fushatë kundër inteligjencës artificiale apo kundër qendrave të të dhënave në vetvete. Shqetësimi i saj lidhet me një model që, sipas saj, po përsëritet në shumë zona: projektet shpallen pasi lejet kryesore janë miratuar, zhvilluesit shmangin komunikimin me publikun dhe zyrtarët lokalë nënshkruajnë marrëveshje konfidencialiteti përpara se komuniteti të informohet për planet që mund të ndryshojnë ndjeshëm zonën ku jeton. Debati vjen në një moment kur kërkesa për kapacitete kompjuterike po rritet me ritme të paprecedenta për shkak të zhvillimit të modeleve të inteligjencës artificiale. Kompani të mëdha teknologjike dhe investitorë po njoftojnë projekte shumë miliardëshe për ndërtimin e qendrave të reja të të dhënave, si në SHBA ashtu edhe në Evropë.
Megjithatë, krahas entuziazmit ekonomik, po shtohen edhe pyetjet mbi ndikimin e këtyre objekteve në konsumin e energjisë elektrike, përdorimin e ujit, ndotjen akustike dhe kostot që mund të transferohen te komunitetet lokale. Këto shqetësime kanë nxitur rezistencë në disa rajone amerikane dhe kanë shtyrë autoritetet lokale të rishikojnë procedurat e miratimit të projekteve të reja. Për Brockovich, çështja thelbësore nuk është ndalimi i zhvillimit teknologjik, por sigurimi që komunitetet të mos jenë të fundit që mësojnë për projekte me ndikim të madh në jetën e tyre të përditshme. Në një kohë kur gara globale për inteligjencën artificiale po intensifikohet, ajo argumenton se transparenca dhe llogaridhënia duhet të ecin paralelisht me inovacionin.
Discussion about this post