Discord ka aktivizuar zyrtarisht enkriptimin “end-to-end” për të gjitha thirrjet audio dhe video në platformë, duke e kthyer privatësinë në një nga prioritetet kryesore të aplikacionit të njohur të komunikimit. Funksioni tashmë është aktiv për çdo përdorues dhe nuk kërkon konfigurim manual. Kjo do të thotë se bisedat audio dhe video do të jenë të koduara në mënyrë që as vetë Discord të mos ketë akses në përmbajtjen e komunikimeve. Sistemi përdor protokollin DAVE, teknologjia e enkriptimit që Discord ka zhvilluar gradualisht që prej vitit 2023 dhe filloi ta implementonte publikisht në 2024.
Ndryshimi përfshin voice calls, video calls, voice channels dhe funksionin “Go Live”, të përdorura gjerësisht nga komunitetet gaming, grupet online dhe përdoruesit që komunikojnë përmes serverëve privatë. Discord konfirmoi se funksioni është shpërndarë tashmë globalisht për qindra miliona përdorues të platformës. Megjithatë, mesazhet tekstuale në Discord nuk do të enkriptohen “end-to-end”. Kompania tha se kjo lidhet me politikat e moderimit dhe sigurisë së platformës, pasi Discord vazhdon të mbështetet te monitorimi i përmbajtjes për të luftuar abuzimet, spam-in dhe aktivitetet e dëmshme online.
Lëvizja vjen në një moment delikat për industrinë e komunikimit online. Vetëm pak javë më parë, Meta hoqi dorë nga planet për enkriptimin “end-to-end” në Instagram, duke argumentuar se teknologjia e vështirësonte identifikimin e aktiviteteve të rrezikshme në platformë. Për Discord, aktivizimi i enkriptimit shihet si një përpjekje për të konkurruar më fort me platforma si Signal, WhatsApp dhe Telegram në aspektin e privatësisë. Por vendimi gjithashtu mund të rrisë presionin nga autoritetet rregullatore dhe organizatat e sigurisë, të cilat prej vitesh argumentojnë se komunikimet plotësisht të koduara e bëjnë më të vështirë hetimin e krimeve online.
Discussion about this post