Një aplikacion kinez që dikur njihej kryesisht për modë, kozmetikë dhe influencues, tani po sfidon seriozisht Instagramin në industrinë globale të turizmit. Sipas një raportimi të ri të WIRED, platforma RedNote, e njohur në Kinë si Xiaohongshu po shndërrohet në një infrastrukturë të re udhëtimi për miliona përdorues që kërkojnë eksperienca më reale, më lokale dhe më pak të kuruara artificialisht.
Ndryshe nga Instagram, ku destinacionet shpesh filtrohen për estetikë dhe viralitet, RedNote funksionon më shumë si një motor rekomandimesh komunitare. Përdoruesit publikojnë guida praktike, çmime reale, itinerare, paralajmërime për turistët dhe sugjerime hiper-lokale që algoritmi i aplikacionit i shpërndan me shpejtësi. Në shumë qytete aziatike, restorantet, hotelet dhe lagjet po përshtaten tashmë për “trafikun RedNote”, jo për Instagramin. Disa biznese madje krijojnë hapësira specifike ose oferta të menduara për përdoruesit e aplikacionit, sepse një postim viral në RedNote mund të sjellë fluks të menjëhershëm turistësh.
Fenomeni po reflekton një ndryshim më të madh kulturor në internet. Gjenerata e re e përdoruesve duket se po largohet nga përmbajtja shumë e kuruar dhe po kërkon platforma që kombinojnë rrjetet sociale me informacion praktik. Në këtë model të ri, influencuesi tradicional zëvendësohet nga rekomandimet kolektive të komunitetit. Për kompanitë amerikane të teknologjisë, ngritja e RedNote është një sinjal i qartë se beteja për të ardhmen e internetit social nuk po zhvillohet më vetëm në Silicon Valley. Kina po eksporton gradualisht jo vetëm aplikacione, por edhe mënyra të reja të përdorimit të internetit dhe turizmi mund të jetë një nga sektorët ku kjo ndryshim po shihet më shpejt.
Discussion about this post