Autoritetet franceze kanë urdhëruar Apple që të pezullojë shitjet e iPhone 12 për shkak se lëshon shumë rrezatim elektromagnetik.
Sipas agjencisë franceze që rregullon frekuencat e radios (Anfr), testet zbuluan se modeli lëshon më shumë valë elektromagnetike të afta të përthithen nga trupi sesa lejohet. Anfr specifikoi se kishte “urdhëruar Apple të tërhiqte iPhone 12 nga tregu francez duke filluar nga 12 shtatori për shkak të tejkalimit të kufirit” të përthithjes elektromagnetike dhe të riparonte telefonat ekzistues.
Laboratorët e akredituar gjetën një thithje të energjisë elektromagnetike nga trupi prej 5.74 vat për kilogram kur telefoni mbahej në dorë ose në xhep. Në këto teste standardi evropian parashikon një shkallë absorbimi prej 4.0 Watts për kilogram. “Në lidhje me telefonat e shitur tashmë, Apple duhet të marrë masa korrigjuese sa më shpejt që të jetë e mundur për t’i sjellë telefonat në përputhje,” tha Anfr, “ose do të duhet t’i tërheqë ato. Apple kundërshtoi gjetjet e Anfr, duke thënë se kishte paraqitur analiza të shumta të pavarura që tregonin se pajisjet ishin në përputhje, por se kompania do të vazhdonte të punonte me rregullatorin.
Organizata Botërore e Shëndetësisë thotë se, pas shumë studimeve, «nuk janë demonstruar asnjë efekt negativ shëndetësor të shkaktuar nga telefonat celularë». Lajmi nga Franca erdhi në ditën kur Apple zbuloi linjën e re të iPhone 15, e para që shfaqi një port universal karikimi në vend të atyre ekskluzive “Lightning” pas një sherri me rregullatorët evropianë.
BE këmbëngul se të gjithë telefonat dhe pajisjet e tjera duhet të jenë të pajtueshme me kabllot e karikimit USB-C nga fundi i vitit të ardhshëm, një veprim që sipas saj do të reduktojë mbeturinat dhe do të kursejë paratë e konsumatorëve.
Discussion about this post