Nëse kalon pak kohë në X, sidomos në zonat e zjarrta të debatit politik amerikan, është e pamundur të mos hasësh llogari që shpërthejnë nga entuziazmi për Donald J. Trump. Profile me flamuj amerikanë, foto patriotike dhe slogane “MAGA” që premtojnë ta “shpëtojnë Amerikën”.
Por ditët e fundit, e gjithë kjo fasadë ka marrë një goditje të fortë. Falë një veçorie të re të X që tregon vendndodhjen e përdoruesve, përdorimi i disa prej këtyre llogarive rezulton të mos jetë aspak amerikan. Le të marrim një shembull: “Fan Trump Army”. Një llogari mjaft e madhe, me qindra mijëra ndjekës, plot energji, plot video e mesazhe patriotike. Me një klik të thjeshtë, zbulohet se menaxhohet… nga India.
Një tjetër llogari shumë e përhapur, “Commentary Donald J. Trump”, që poston çdo ditë kundër emigrantëve, politikanëve të majtë dhe gjithçkaje që lidhet me kundërshtarët e Trumpit, rezulton se është regjistruar në Afrikë. Dhe megjithatë, përmbajtja e saj shpërndahet në mënyrë të rregullt nga vetë Trump, i cili e merr si zë “patriotësh amerikanë”. E njëjta histori përsëritet me dhjetëra llogari të tjera: profile që sillen si aktivistë lokalë amerikanë, por në të vërtetë vijnë nga Rusia, Lindja e Mesme, Evropa Lindore e deri në vende të largëta të Azisë.
Për shumë përdorues të X, zbulimi ishte tronditës — si të zbulosh se turma që të duartroket në një shesh s’është aty për ty, por janë manekinë të vendosur nga diku tjetër. Megjithatë, ajo që e çudit edhe më shumë situatën është mënyra si Trump vazhdon t’i promovojë këto llogari, sikur zbulimet të mos ekzistonin fare. Çdo “repost” i tij u jep atyre jehonë, besueshmëri dhe një audiencë të re brenda votuesve amerikanë.
Në këtë rrëmujë mbeten disa pyetje të mëdha:
Kush qëndron pas këtyre profileve? Çfarë interesi kanë vende nga të gjitha cepat e botës që të ndërhyjnë në debatin politik amerikan? Dhe pse një figurë si Trump zgjedh t’u japë një platformë të re llogarive që qartazi nuk janë ata që pretendojnë? Për momentin, faktet janë të qarta: shumë prej zërave më të fortë që bërtasin “Make America Great Again!” nuk janë fare nga Amerika. Dhe X, me gjithë transparencën e re, vetëm sa e ka bërë këtë realitet më të dukshëm.
Discussion about this post