Ferrari dhe Lamborghini, janë sot 2 nga markat më të famshme të makinave sportive luksoze. Dy kompanitë italiane, janë konkurrente të forta në një treg relativisht të kufizuar, për shkak të çmimeve të larta që kanë këto automjete.
Por rivaliteti mes tyre, buron nga themeluesit e dy kompanive: Enzo Ferrari dhe Ferruço Lamborxhini. Enzo kishte bërë emër dhe para me kohë. Ferruço merrej kryesisht me prodhimin e traktorëve për bujqësinë. Për shkak të të ardhurave të mira, bleu disa makina luksoze për t’i ngarë për qejf, mes tyre edhe një Ferrari.
Kur përdori në fillim këtë të fundit, vuri re disa të meta, mes tyre zhurmën e fortë të motorit dhe manovrueshmërinë e vështirë të mjetit. Vendosi që këto t’ia thotë vetë Enzo Ferrarit. Por ky nuk i priti aq mirë kritikat e tij, duke i thënë se një mekanik traktorësh, nuk mund të jepte mend për një makinë si Ferrari.
I fyer në sedër, Ferruço u mbyll në ofiçinën e tij, dhe në pak muaj ndërtoi makinën e tij, duke shmangur gabimet që vuri re tek Ferrari. “Lamborghini 350 GTV”, mahniti të pranishmit në në Panarin e Motorave në Torino në tetorin e vitit 1963. Nga ai moment, Lamborxhini u bë një nga markat më të famshme, dhe një rivale e përjetshme e Ferrarit.
Discussion about this post