Filmi i famshëm “Blade Runner” i vendos ngjarjet në një Los Anxheles të imagjinuar të vitit 2019, një qytet futurist ku binte një shi acid dhe qielli ishte i mbushur me “skimmers”, makinat fluturuese. Që nga ai film i vitit 1982, teknologjia ka përparuar në mënyra që as vetë Hollivudi nuk mund t’i parashikonte:shkopinj për të bërë foto selfi, dronë që kryejnë vrasje nga distanca, politika e hashtag-ut etj.
E megjithatë automjetet fluturuese duken ende si një fantazi e largët, e rezervuar për romanet e fanta-shkencës. Në fakt, makinat fluturuese janë reale, dhe ato mund të diktojnë mënyrën se si do udhëtojmë, punojmë dhe jetojmë në dekadat e ardhshme.
Përparimet në industrinë e baterive, shkencës së materialeve dhe simulimit kompjuterik, kanë nxitur zhvillimin e një sërë automjetesh fluturuese personale, nga avionët elektrikë tek ata me krah të fiksuar dhe dronët quadcopter. Këto avionë, mund të mos duken tamam siç u imagjinuan dikur nga “Blade Runner”.
Por nuk janë dhe aq larg. Shumë më të vogla se një avion komercial, shumica e tyre janë të dizenjuara me rrotullues në vend të krahëve, të cilët lejojnë ngritjen vertikale si dhe uljen. Më e rëndësishmja:këto automjete janë krijuar për të garantuar lëvizje më të shpejtë sesa mënyrat tradicionale të tranzitit për individët, sidomos në qytetet që bllokohen shpesh nga trafiku.
Dhjetra kompani po garojnë për zhvillimin e avionëve komercialë, motoçikletave fluturuese dhe taksive personale fluturuese. Kjo industri në zhvillim e sipër mund të vlejë deri në 1.5 trilionë dollarë deri në vitin 2040.
Ndërkohë, autoritetet e aviacionit kanë shfuqizuar politikat dhe standardet e sigurisë që do të rregullojnë këtë fushë të re të transportit. Për shembull, kompania gjermane “Volocopter” ka nisur shitjen e prototipit të saj “VoloCity” si taksinë e parë ajrore elektrike, një automjet që do të funksionojë pa pilot.
Në fillim, “VoloCity” do të ketë vend vetëm për një pasagjer. Kjo do të nënkuptojë një kosto më të lartë për udhëtimin, por kompania shpreson të fitojë në fillim besimin e konsumatorit, përpara se të kalojë në një model me autonomi të plotë.
Një automjet tërësisht elektrik, pa krahë, që ecën falë 9 baterive, dhe që do të transportojë pasagjerë në të gjithë rrjetin e planifikuar të aeroporteve të krijuar enkas për avionë që ngrihen dhe ulen vertikalisht në qytetet kryesore.
Fluturimet e para komerciale të “VoloCity”, janë planifikuar të nisin në vitin 2022. Ato do të kushtojnë në fillim 300 euro. Kompani të tjera kanë bashkëpunuar me prodhuesit ekzistues të makinave, për të krijuar modele që ata planifikojnë të zhvillojnë për një përdorim të mundshëm tregtar.
Për shembull kompania japoneze “SkyDrive”, iu bashkua së fundmi “Toyota”-s për të kryer një fluturim provë të taksisë ajrore plotësisht elektrike, që thuhet se është automjeti më i vogël elektrik në botë që mund të ngrihet dhe të ulet nga një pozicion vertikal.
Verën që shkoi, kompania testoi me sukses modelin e saj SD-03 për disa minuta me një pilot brenda. Transporti vertikal plotësisht i automatizuar, mund ta lehtësojë jetën e qytetarëve, por një rrjet i gjerë objektesh fluturuese krijon një mori sfidash të reja.
Kompanitë që operojnë në këtë fushë, do të shmangin nevojën për pistat ose parkimin në tokë, por ato do të kërkojnë korridore ajri të posaçme për të garantuar sigurinë e mjeteve të tyre. Taksitë fluturuese, mund të zvogëlojnë numrin e makinave që ecin në tokë dhe të rrisin parashikueshmërinë e kohës së mbërritjes dhe nisjes, por numri i madh i objekteve në qiell -ku ka godina, zogj, dronë, dhe avionë – do të kërkojë pilotë në drejtimin e këtyre mjeteve.
Në tetor, anëtarët e ekuipazhit të një avioni komercial pranë aeroportit LAX në Los Angeles panë një jetpack në lartësinë 1.828 metra, një lartësi që paraqet rrezik serioz të përplasjes.
Agjencia Evropiane e Sigurisë së Aviacionit (EASA), ka hartuar një sërë specifikimesh teknike për këto lloj mjetesh, edhe pse nuk ka vendosur se si t’i certifikojë ato.
EASA duket e pavendosur mbi atë që ndan këto mjete nga avionët komercialë, ose helikopterët me krah të fiksuar.
Efektet nga këto shpikje, mund të transformojnë udhëtimin dhe jetesën siç e njohim sot. Kështu bizneset nuk kanë nevojë të kërkojnë zyra në qendër të qyteteve, ndërsa punonjësit mund të zgjedhin të jetojnë kudo, mjafton që të kenë një makinë fluturuese. Në të ardhmen, pasja e një makine të tillë mund të jetë po aq e përballueshme dhe e kudogjendshme sa edhe e një biçiklete.
Burimi i lajmit: https://www.bbc.com/future/article/20201111-the-flying-car-is-here-vtols-jetpacks-and-air-taxis
Përshtatur nga TIRANA TODAY
