Brukseli po përgatit një hap të rëndësishëm drejt sigurimit të rrjeteve të komunikimit në Evropë. Komisioni Europian po konsideron të miratojë një ligj që do t’i detyrojë vendet anëtare të BE-së të largojnë pajisjet e firmave kineze Huawei Technologies dhe ZTE Corporation nga rrjetet e tyre 5G dhe infrastrukturat e tjera të telekomit.
Vetëm pak vjet më parë, në 2020, Komisioni kishte rekomanduar që furnizuesit e etiketuar si “me rrezik të lartë” të përjashtohen nga rrjetet e komunikimit. Por kjo kishte mbetur vetëm në nivel rekomandimi. Së fundmi, zëvendëspresidentja e Komisionit, Henna Virkkunen, po përpiqet të bëjë këto udhëzime ligjërisht të detyrueshme.
Nëse ligji miratohet, vendet anëtare që nuk do të përmbushin kërkesat mund të përballen me procedura shkeljeje ose me gjoba financiare. Një tjetër pikë kyçe është se politika do të përfshijë edhe kufizime për përfshirjen e firmave kineze në projektet me fibra optike dhe rrjete të tjera të gjera.
Ky nismë vjen në një kohë kur tensionet teknologjike dhe gjeopolitike midis BE-së dhe Kinës janë shtuar. Kina ka reaguar menjëherë duke kërkuar trajtim të drejtë dhe transparent për kompanitë e saj, duke paralajmëruar se përjashtimet mund të minojnë besimin e investitorëve të huaj.
Ndërkaq, për kompanitë europiane të telekomit dhe zhvilluesit e infrastrukturës mbetet sfida e kostos dhe kohës së zëvendësimit (“rip & replace”). Ndërrimi i pajisjeve, veçanërisht për ato që janë të integruara prej vitesh, kërkon investime të mëdha dhe menaxhim të kujdesshëm operativ.
Megjithatë, për Komisionin, prioritet është reduktimi i varësisë nga furnizues të jashtëm të cilët mund të përbëjnë rrezik për sigurinë kombëtare dhe ruajtjen e integritetit të rrjeteve kritike të komunikimit.
Discussion about this post