Dokumente konfidenciale të publikuara së fundmi nga blogeri Ed Zitron kanë zbuluar detaje të reja mbi marrëdhënien financiare midis OpenAI dhe Microsoft. Ato tregojnë se marrëveshja mes dy kompanive është shumë më komplekse sesa perceptimi publik deri tani, me pagesa të mëdha që kalojnë në të dy drejtimet.
Sipas dokumenteve, vetëm gjatë vitit 2024 OpenAI ka paguar afërsisht 493.8 milionë dollarë për Microsoft, si pjesë e një marrëveshjeje të ndarjes së të ardhurave. OpenAI raportohet të ndajë rreth 20% të të ardhurave të saj me Microsoft, si pjesë e investimit gjigant prej mbi 13 miliardë dollarësh që Microsoft ka bërë në kompani.
Megjithatë, marrëdhënia nuk mbaron këtu. Burime të TechCrunch thonë se Microsoft gjithashtu i transferon OpenAI një pjesë të të ardhurave të gjeneruara nga shërbimet Bing dhe Azure OpenAI. Përqindja e këtij kompensimi është më e ulët se 20%, por mjaftueshëm e rëndësishme për të treguar se të dyja kompanitë përfitojnë nga aktivitetet e njëra-tjetrës. Kjo e bën marrëveshjen financiare shumë më të ndërthurur dhe më të vështirë për t’u ndjekur se sa është raportuar më parë.
Dokumentet tregojnë se shifra prej 865.8 milionë dollarësh e raportuar për tre tremujorët e parë të vitit 2025 i referohet “net revenue share”, që do të thotë shuma e mbetur pasi zbriten shpenzimet operative dhe kostot që Microsoft mbulon për OpenAI, përfshirë shërbimet e bazuara në Bing dhe Azure.
Një tjetër pjesë e rëndësishme e dokumenteve lidhet me kostot e larta të inference, pra fuqisë kompjuterike të përdorur për të ekzekutuar modelet e inteligjencës artificiale. OpenAI thuhet të ketë shpenzuar rreth 3.8 miliardë dollarë për inference gjatë vitit 2024 dhe 8.65 miliardë dollarë për nëntë muajt e parë të vitit 2025. Analiza e Zitron sugjeron se këto shpenzime mund të jenë më të mëdha se të ardhurat që kompania arrin të gjenerojë, duke ngritur pikëpyetje mbi qëndrueshmërinë e modelit të biznesit të saj.
As OpenAI dhe as Microsoft nuk kanë komentuar ende mbi informacionet e publikuara, duke lënë hapur shumë pyetje për të ardhmen e partneritetit të tyre strategjik.
Discussion about this post