Dy kontraktorë të mëparshëm të një agjencie federale në SHBA janë akuzuar për fshirjen e databazave qeveritare menjëherë pasi u pushuan nga puna — një incident që ka hapur debat të gjerë mbi rrezikun e “kërcënimeve të brendshme” në sistemet digjitale të institucioneve publike. Sipas akt-akuzës së Departamentit të Drejtësisë, vëllezërit Muneeb dhe Sohaib Akhter dyshohet se përdorën ende aksesin aktiv në sistem për të fshirë të dhëna kritike vetëm pesë minuta pasi njëri prej tyre u njoftua për largimin.
Autoritetet thonë se pavarësisht ndërprerjes së menjëhershme të aksesit për njërin prej tyre, tjetri ruante ende kredenciale administrative që i lejuan të hynte në një server të përdorur nga qindra agjenci federale. Prej andej është kryer fshirja e databazave, e cila besohet se ka shkaktuar ndërprerje të shërbimeve, kosto financiare dhe rrezik për të dhënat institucionale. Vëllezërit, të moshës 34 vjeçare, kishin punuar për një kompani kontraktuese që ofronte infrastrukturë teknike për një gamë të gjerë institucionesh federale. Pas pushimit të tyre më 18 shkurt 2025, sipas prokurorëve, ata hynë në sistem nga distanca dhe nisën fshirjen e të dhënave, duke shfrytëzuar boshllëqet në procesin e çaktivizimit të menjëhershëm të llogarive. Incidenti ka ngritur shqetësime serioze për mënyrën si menaxhohen akseset administrative në sektorin publik.
Ekspertët e sigurisë thonë se rastet e tilla tregojnë se një sulm nga brenda mund të jetë po aq i rrezikshëm sa një sulm i jashtëm — nëse jo më shumë — pasi personat në fjalë njohin arkitekturën e sistemit dhe dobësitë e tij. Ndërkohë, hetimi ende vazhdon. Nuk dihet plotësisht se sa të dhëna janë humbur, nëse mund të rikuperohen apo çfarë ndikimi ka pasur fshirja në shërbimet operative të agjencive federale. Autoritetet pritet të zbulojnë edhe nëse ka patur motive personale apo financiare pas veprimit. Për institucionet qeveritare, ky është një kujtesë e fortë se siguria digjitale nuk është vetëm çështje teknologjie, por edhe e menaxhimit të burimeve njerëzore dhe e standardeve të kontrollit të aksesit.
Discussion about this post