OpenAI ka prezantuar një përditësim të ri për ChatGPT që u jep përdoruesve kontroll të drejtpërdrejtë mbi mënyrën se si komunikon modeli, duke lejuar rregullimin e nivelit të “ngrohtësisë” dhe entuziazmit në përgjigje. Funksioni i ri, synon ta bëjë përvojën me AI më personale dhe më të përshtatur sipas preferencave individuale.
Përmes seksionit Personalization në aplikacion, përdoruesit tani mund të zgjedhin nëse ChatGPT duhet të jetë më i përmbajtur, neutral apo më energjik dhe i ngrohtë në komunikim. Cilësimet janë të thjeshta dhe intuitive, duke ofruar opsione si “më shumë”, “më pak” ose “parazgjedhje”, pa pasur nevojë për komandime të komplikuara apo udhëzime shtesë në çdo bisedë. Përveç tonit emocional, përditësimi u jep përdoruesve ndikim edhe mbi stilistikën e përgjigjeve, përfshirë përdorimin e emoji-ve, strukturimin e tekstit me tituj apo paragrafë të ndarë, si dhe mënyrën e paraqitjes së informacionit. Kjo e bën ChatGPT më fleksibël si për përdorim profesional, ashtu edhe për biseda më kreative ose informale.
Ky ndryshim vjen pas reagimeve të shumta nga përdoruesit gjatë vitit 2025, kur disa ankesa lidhej me faktin se modeli herë pas here perceptohej si tepër i ftohtë dhe mekanik, ndërsa në raste të tjera si shumë entuziast apo tepër miqësor, në varësi të kontekstit. Duke i kaluar këto zgjedhje drejtpërdrejt në duart e përdoruesit, OpenAI synon të krijojë një ekuilibër më të qëndrueshëm. Në plan më të gjerë, kjo lëvizje pasqyron një prirje të fortë në zhvillimin e inteligjencës artificiale: personalizimin e përvojës së përdoruesit, jo vetëm në nivel funksional, por edhe në aspektin emocional dhe komunikues. Ndërsa AI po integrohet gjithnjë e më shumë në punë, edukim dhe krijimtari, mënyra se si “flet” një model po bëhet po aq e rëndësishme sa ajo që thotë.
Me këtë përditësim, ChatGPT shndërrohet nga një mjet me një stil të vetëm komunikimi në një asistent më adaptiv, që mund të përshtatet me kontekstin, audiencën dhe preferencat personale të çdo përdoruesi.
Discussion about this post