Google ka nisur një funksion të ri për telefonat Android që mund të ndryshojë mënyrën si njerëzit kërkojnë ndihmë në situata emergjente. Përdoruesit tani mund të dërgojnë video live drejtpërdrejt te shërbimet e emergjencës — duke i dhënë operatorëve një pamje reale të situatës në vendin e ngjarjes, në kohë reale.
Derisa më parë operatorët mbështeteshin vetëm tek fjalët e telefonuesit për të kuptuar çfarë po ndodhte, ky mjet i ri i Android lejon transmetimin e pamjeve nga kamera e pasme e telefonit drejt qendrës së emergjencës (p.sh., 112 në Evropë ose 911 në SHBA). Ky mund të bëhet gjatë thirrjes së një emergjence, me përdoruesin që jep pëlqimin eksplcit për dërgimin e pamjeve live — duke siguruar kështu privatësinë e përdoruesit dhe kontrollin mbi përmbajtjen e dërguar. Videoja live mund të ofrojë një nivel informacioni që fjalët nuk e japin dot: evidenca vizuale për lëndimet, përshkrime të mjedisit, vendndodhje të sakta të incidentit apo detaje të tjera me rëndësi jetike që ndihmojnë stafet e emergjencës të marrin vendime më të shpejta dhe më të informuara para mbërritjes në vendin e ngjarjes. Google thekson se ky funksion është projektuar me kujdes që të respektojë privatësinë: ai kërkon pëlqimin e përdoruesit dhe videoja transmetohet vetëm gjatë thirrjes së emergjencës. Ajo nuk ruhet në servera të palëve të treta dhe përdoret vetëm nga ekipi shpëtues për kohëzgjatjen e situatës së emergjencës.
Ky tipar është i ngjashëm me zgjidhjet që disa departamente policore dhe shërbime të emergjencës kanë testuar në disa vende, por integrimi i tij direkt në Android e bën shumë më të aksesueshëm për miliona përdorues në mbarë botën. Me këtë risi, Android synon të rrisë sigurinë dhe efektivitetin e reagimit ndaj emergjencave — duke u dhënë njerëzve një mënyrë më të drejtpërdrejtë, më të sigurtë dhe më të qartë për të ndihmuar ekipet shpëtuese të kuptojnë shpejt situatën kritikë në të cilën ndodhen.
Discussion about this post