OpenAI ka prezantuar një paketë propozimesh që synon të rindërtojë ekonominë në epokën e inteligjencës artificiale, duke përfshirë idenë e taksave për robotët, krijimin e fondeve publike dhe një javë pune prej katër ditësh pa ulje page. Sipas kompanisë, këto masa do të ndihmojnë që fitimet e prodhuara nga AI të shpërndahen më drejt, të rritet mbrojtja e punonjësve dhe të sigurohet qasje e gjerë në teknologjitë e reja.
Këto propozime vijnë në një kohë kur shqetësimet për humbjen e vendeve të punës, përqendrimin e pasurisë dhe ndërtimin e qendrave të të dhënave po rriten. OpenAI sugjeron një ndryshim të ngarkesës fiskale nga paga tek kapitali, duke përfshirë taksa më të larta mbi fitimet e korporatave, kapitalin dhe përfitimet nga investimet e AI. Ideja e taksës për robotët, e mbështetur edhe nga Bill Gates, do të siguronte që një robot të paguajë një shumë të ngjashme me atë që do të paguante një punonjës që zëvendëson. Një nga propozimet më inovative është krijimi i një Fondi Publik të Pasurisë, që do t’u siguronte amerikanëve një pjesë të drejtpërdrejtë të fitimeve nga kompanitë dhe infrastruktura e AI, pavarësisht nëse investojnë në treg. Kthimet nga ky fond do të shpërndahen tek qytetarët, duke i dhënë publikut akses në rritjen ekonomike që po gjeneron inteligjenca artificiale.
OpenAI gjithashtu mbështet masa më të drejtuara te punonjësit, si rimbursime për javën e punës me katër ditë, mbulimin më të madh të kostove të kujdesit shëndetësor dhe përkujdesjen për fëmijët ose të moshuarit. Megjithatë, këto përfitime mbeten kryesisht të varura nga punëdhënësit dhe nuk ofrojnë mbulim universale nga qeveria për ata që humbasin vendet e punës nga automatizimi. Përtej reformave sociale, OpenAI propozon edhe masa sigurie: krijimin e trupave mbikëqyrës për AI, mbrojtje ndaj përdorimeve të rrezikshme si sulmet kibernetike ose kërcënimet biologjike, si dhe plane për të përmbajtur sisteme që mund të operojnë jashtë kontrollit njerëzor. Kompania sheh AI si një mjet që duhet trajtuar si një shërbim publik, ku industrinë dhe qeverinë duhet të bashkëpunojnë për ta mbajtur të përballueshme dhe të aksesueshme për të gjithë.
OpenAI thekson se po hyjmë në një “fazë të re të organizimit ekonomik dhe shoqëror” që do të transformojë mënyrën e punës, dijes dhe prodhimit, dhe që kërkon politika të reja industriale që sigurojnë përfitime të përbashkëta nga superinteligjenca.
Discussion about this post