Studiuesi kinez Hë Gjen Kui i doli në mbrojtje publikisht pretendimit të tij se ka krijuar foshnjat e para gjenetikisht të modifikuara në botë. Ai mbajti një fjalim në një konferencë biomjekësore të mërkurën në Hong Kong. Fjalimi vjen dy ditë pasi zoti Hë publikoi një video në internet duke pretenduar se kishte përdorur një teknologji të përpunimit të gjeneve të quajtur CRISPR, për të ndryshuar ADN-në e vajzave binjake të lindura. Rezultatet e gjakut të babai të binjakeve tregonin se ai ishte bartës i virusit HIV. Modifikimi u bë me qëllimin për të parandaluar transmetimin e virusit që shkakton SIDA-n tek dy foshnjet.
Zoti Hë tha se e kreu hulumtimin e tij në fshehtësi. Puna e tij nuk është verifikuar nga ndonjë organizatë e pavarur dhe ai nuk ia ka dorëzuar raportin ndonjë reviste shkencore ku mund të shqyrtohej nga ekspertët. Por ai u tha kolegëve se ndihej “shumë krenar” për arritjen e tij.
Pretendimet e He Gjen Kuit kanë shkaktuar skepticizëm dhe kritika të forta. Autoritetet e universitetit për Shkencën dhe Teknologjinë në Shenxhen ku ai punon, thotë se ai ka qenë me pushime pa pagesë që prej muajit shkurt. Shkolla denoncoi kërkimet e tij për shkelje të “etikës akademike dhe kodit të sjelljes”. Qeveria kineze po u kërkon autoriteteve lokale të nisin një hetim mbi punën e tij.
Menjëherë pas fjalimit të He Jiankui-t në takimin e dytë Ndërkombëtar mbi Modifikimin Gjenetik tek njerëzit, biologu amerikan David Baltimore, një fitues i Nobelit në fiziologji dhe në cilësinë e drejtuesit të takimit e quajti atë “të papërgjegjëshëm”. Modifikimi gjenetik krijon mundësinë për të hequr sëmundjet e trashëguara prej gjeneve, por shkencëtarët shqetësohen se kjo mund të përdoret për të krijuar të ashtuquajturat “foshnje të projektuara”. Ata shqetësohen gjithashtu se çdo modifikim gjenetik mund të çojë në ndryshimin e gjeneve të tjera në mënyra të paparashikueshme./VOA/
Discussion about this post