Apple ka larguar nga App Store aplikacionin ICEBlock (Immigration and Customs Enforcement Blocker) dhe disa aplikacione të tjera që u mundësonin përdoruesve të ndanin në mënyrë anonime vendndodhjet e agjentëve të Shërbimit të Emigracionit dhe Doganave të SHBA (ICE). Vendimi erdhi pas presionit nga administrata Trump, që i konsideroi këto aplikacione një rrezik sigurie.
ICEBlock, që u bë viral më herët këtë vit, lejonte përdoruesit të raportonin brenda një rrezeje prej 5 miljesh lokacionin e agjentëve dhe të jepnin detaje për pamjen dhe veshjen e tyre.
Pse u hoq aplikacioni
Sipas mediave amerikane, Apple tha se aplikacionet u hoqën pas një kërkese nga organet e zbatimit të ligjit, të cilat ngritën shqetësime për “rreziqe sigurie” të lidhura me funksionimin e ICEBlock. Fillimisht lajmi u raportua nga Fox Business, që citoi Prokuroren e Përgjithshme Pam Bondi. Ajo deklaroi se Departamenti i Drejtësisë kishte kontaktuar Apple për të ndërhyrë.
Megjithatë, një analizë e pavarur nga TechCrunch konfirmoi se ICEBlock nuk grumbullonte dhe nuk ruante të dhëna të përdoruesve.
Tensionet politike dhe incidentet e fundit
Ky vendim vjen në një klimë të tensionuar rreth politikave të emigracionit në SHBA. Vetëm pak ditë më parë, një incident i rëndë ndodhi në një qendër paraburgimi të ICE në Dallas, ku dy persona u vranë dhe një tjetër u plagos. Autoritetet më pas deklaruan se sulmuesi kishte përdorur aplikacione për të gjurmuar praninë e agjentëve të ICE.
Qeveria amerikane ka paralajmëruar disa herë se aplikacione të tilla mund të rrezikojnë jetën e punonjësve federalë. Sekretarja e Sigurisë Kombëtare, Kristi Noem, në korrik madje sugjeroi se edhe CNN mund të përballej me padi për raportimin e saj mbi aplikacionin.
Presioni mbi zhvilluesin
Zhvilluesi i ICEBlock, Joshua Aaron, ka qenë gjithashtu nën shënjestrën e autoriteteve. Prokurorja Bondi paralajmëroi publikisht se Departamenti i Drejtësisë po “e shihte nga afër” aktivitetin e tij.
Apple dhe Departamenti i Drejtësisë nuk kanë dhënë ende një koment zyrtar, ndërsa zhvilluesit e aplikacionit nuk janë kontaktuar.
Discussion about this post