Gara globale për inteligjencën artificiale po hyn gradualisht në një fazë të re, ku ambicia nuk kufizohet më vetëm te krijimi i chatbot-ëve më të avancuar apo modeleve më të fuqishme gjuhësore. Në qendër të debatit po shfaqet një objektiv shumë më i madh: ndërtimi i sistemeve të AI që mund të evoluojnë dhe të përmirësojnë vetveten. Kjo ide qëndron në themel të Recursive Superintelligence, startup-it të ri të themeluar nga studiuesi i AI Richard Socher. kompania ka dalë nga “stealth mode” me rreth 650 milionë dollarë financim dhe me fokus te ajo që në industrinë e AI quhet “recursive self-improvement”, aftësia e një sistemi për të identifikuar dobësitë e veta, për të testuar zgjidhje të reja dhe për të optimizuar performancën pa pasur nevojë për ndërhyrje të vazhdueshme nga inxhinierët.
Koncepti është diskutuar prej vitesh në qarqet akademike të inteligjencës artificiale, por zhvillimet e fundit në modelet gjenerative dhe sistemet autonome e kanë afruar më shumë me realitetin praktik. Ideja është që AI të mos përdoret vetëm për të ndihmuar kërkimin shkencor, por për të marrë pjesë aktive në vetë procesin e përmirësimit të modeleve. Mbështetësit e kësaj qasjeje argumentojnë se sisteme të tilla mund të përshpejtojnë ndjeshëm zhvillimin teknologjik dhe shkencor. Në teori, AI mund të analizojë kodin e vet, të testojë variante të reja dhe të optimizojë mënyrën si arsyeton apo zgjidh probleme, në një cikël të vazhdueshëm përmirësimi. Por pikërisht këtu fillojnë edhe shqetësimet.
Sa më autonome të bëhen këto sisteme, aq më e vështirë bëhet të përcaktohet se ku përfundon kontrolli njerëzor. Debati nuk lidhet më vetëm me fuqinë e modeleve, por me parashikueshmërinë, transparencën dhe sigurinë e sistemeve që potencialisht mund të evoluojnë përtej ritmit tradicional të zhvillimit. Industria po zhvendoset nga ndërtimi i AI që reagon ndaj njerëzve drejt sistemeve që mund të mësojnë, të përshtaten dhe gradualisht të ndërtojnë versione më të avancuara të vetes. Për momentin, kjo mbetet ende një ambicie eksperimentale. Megjithatë, fakti që investitorët po derdhin qindra milionë dollarë në këtë drejtim tregon se ideja e “AI që ndërton AI” nuk po trajtohet më si fantashkencë, por si faza e ardhshme e mundshme e industrisë.
Discussion about this post