Në Silicon Valley, fjala më e re që po dominon diskutimet për inteligjencën artificiale është “vibe coding”. Termi përshkruan një mënyrë të re programimi ku njerëzit krijojnë aplikacione thjesht duke i dhënë udhëzime chatbot-ëve si Claude, ChatGPT apo Gemini, pa shkruar manualisht shumicën e kodit. Fenomeni po përhapet me shpejtësi shumë më të madhe nga sa pritej.
Ideja është e thjeshtë: përdoruesi përshkruan atë që dëshiron në gjuhë natyrale dhe AI gjeneron automatikisht faqet, databazat, funksionet dhe logjikën e aplikacionit. Për startup-et dhe njerëzit pa eksperiencë teknike, kjo po shihet si një revolucion që ul barrierat e ndërtimit të software-it.
Por “vibes” nuk po duken aq pozitive për të gjithë. Studime të fundit tregojnë se mijëra aplikacione të krijuara me AI janë publikuar online me probleme serioze sigurie, mungesë autentifikimi dhe rrjedhje të të dhënave. Një analizë e kompanisë RedAccess identifikoi rreth 5 mijë aplikacione “vibe-coded” që ekspozonin të dhëna sensitive ose nuk kishin pothuajse asnjë mbrojtje sigurie. Debati po shkon përtej sigurisë. Në Reddit dhe komunitetet e zhvilluesve, shumë programues argumentojnë se AI mund të shkruajë kod shpejt, por nuk kupton arkitekturën, logjikën afatgjatë apo mirëmbajtjen e projekteve komplekse. Disa e krahasojnë fenomenin me “prodhimin masiv të kodit pa strukturë”.
Megjithatë, kompanitë e AI-së po e shtyjnë fort këtë model. Anthropic, OpenAI dhe startup-e të reja të programimit autonom po investojnë miliarda në mjete që premtojnë se “çdokush mund të bëhet zhvillues software-i”. Për momentin, vibe coding duket më shumë si një eksperiment kulturor sesa një zëvendësim real për inxhinierinë tradicionale. Por nëse AI vazhdon të përmirësohet me këtë ritëm, mënyra si ndërtohet software-i mund të ndryshojë më shpejt sesa vetë industria e teknologjisë e kishte parashikuar.
Discussion about this post