Përplasjet mes Shteteve të Bashkuara dhe Kinës për teknologjinë e gjysmëpërçuesve po hasin gjithnjë e më shumë rezistencë nga aleatët evropianë. Holanda, vendi ku ka selinë ASML – kompania e vetme në botë që prodhon makineritë më të avancuara të litografisë për prodhimin e çipave po kundërshton një projektligj amerikan që do të zgjeronte ndjeshëm kufizimet ndaj eksporteve të teknologjisë drejt Kinës.
Ministri holandez i Tregtisë, Sjoerd Sjoerdsma, zhvilloi këtë javë takime në Uashington me Sekretarin amerikan të Tregtisë, Howard Lutnick, si dhe me anëtarë të Kongresit, për të shprehur shqetësimet e qeverisë holandeze lidhur me të ashtuquajturin MATCH Act. Projektligji synon t’u ndalojë prodhuesve kinezë të çipave aksesin në pajisjet perëndimore të prodhimit të gjysmëpërçuesve, duke zgjeruar kufizimet ekzistuese. Nëse miratohet, ligji do të prekë veçanërisht ASML-në. Aktualisht, Kina përbën rreth 19% të shitjeve neto të sistemeve të kompanisë. Ndërsa eksporti i makinerive më të avancuara EUV drejt Kinës është ndaluar prej vitesh, MATCH Act do të zgjeronte kufizimet edhe mbi makineritë më të vjetra DUV, të cilat deri më tani kanë qenë të lejuara për tregun kinez.
Drejtori ekzekutiv i ASML, Christophe Fouquet, kishte deklaruar më herët se pajisjet DUV që eksportohen në Kinë janë teknologji të zhvilluara rreth një dekadë më parë dhe nuk përfaqësojnë gjeneratën më të avancuar të industrisë. Pikërisht këto sisteme rrezikojnë të ndalohen nëse projektligji amerikan hyn në fuqi. Për Holandën, çështja nuk lidhet vetëm me një kompani, por me konkurrueshmërinë e industrisë evropiane të gjysmëpërçuesve. Zyrtarët argumentojnë se kufizimet e reja mund të kenë pasoja ekonomike të konsiderueshme, pa garantuar domosdoshmërisht objektivat strategjikë të SHBA-së për frenimin e zhvillimit teknologjik të Kinës.
Projektligji MATCH Act, i paraqitur në Kongres gjatë muajit prill, nuk është votuar ende dhe mund të përfshihet në një paketë më të gjerë legjislative. Megjithatë, reagimi i Holandës tregon se Evropa po kërkon të ketë një zë më të fortë në politikat që prekin industrinë globale të çipave, edhe kur ato propozohen nga aleati i saj më i ngushtë.
Discussion about this post