Çfarë kanë të përbashkët puthjet e kafshëve, qumështi i buburrecave, mënyra ideale për të fryrë hundët dhe të brendshmet e varrosura në tokë? Të gjitha janë pjesë e kërkimeve të nderuara këtë vit me çmimet Ig Nobel.
Çmimet Ig Nobel janë një event vjetor që nderon kërkime shkencore të pazakonta ose humoristike, të cilat fillimisht të bëjnë të qeshësh, por më pas të bëjnë të mendohesh. Ato u themeluan në vitin 1991 nga Marc Abrahams dhe organizohen nga revista Annals of Improbable Research. Për 35 vite, ceremonia u zhvillua në SHBA, kryesisht në universitete si Harvard dhe MIT, ndërsa në vitin 2026 u zhvendos për herë të parë në Zyrih të Zvicrës
Ndër fituesit e vitit 2026 janë studiuesit që zhvilluan një përkufizim më të saktë të puthjes duke analizuar kontaktin gojë më gojë te njerëzit dhe disa kafshë. Hulumtimi arriti në përfundimin se edhe paraardhësit tanë Neandertalë mund të kenë pasur një formë të tillë sjelljeje.
Çmimi në Kimi shkoi për një ekip që studioi qumështin e buburrecit. Studiuesit zbuluan se kristalet e proteinave të prodhuara nga një specie e veçantë buburreci përmbajnë më shumë se tre herë energjinë e së njëjtës sasi qumështi të lopës.
Në Mjekësi u vlerësua një studim mbi mënyrën më efikase për të fryrë hundët. Hulumtuesi Tokuji Unno analizoi shpejtësinë, presionin dhe rrjedhën e ajrit gjatë këtij veprimi të përditshëm.
Ndërkohë, çmimi në Fizikë shkoi për një ekip që kërkoi mënyrën për të urinuar që nuk shkakton spërkatje. Sipas modelimeve të tyre, këndi optimal është rreth 30 gradë dhe forma e frymëzuar nga guaska e nautilusit mund të reduktojë ndjeshëm spërkatjet.
Një tjetër kërkim përdori proboscisin e mushkonjave femra si grykë për printim 3D me rezolucion shumë të lartë, ndërsa një studim tjetër përdori të brendshme pambuku të varrosura në më shumë se 25 vende për të matur shëndetin e tokës.
Ig Nobelët, nuk synojnë të tallin shkencën. Ideja është të nxjerrin në pah kërkime të pazakonta që nxisin kureshtjen dhe na bëjnë të mendojmë ndryshe për botën.
Discussion about this post